د اطلاعاتو او فرهنګ وزارت ویاند خبیب غفران د خبریالانو پر وړاندې د جرمونو معافیت پای ته رسولو نړیوالې ورځې په مناسبت ویلي، اسلامي امارت د ځانګړي کمېسیون له لارې د افغان خبريالانو هر ډول ستونزو ته رسېدنه کړې.
غفران زیاتوي:« د اطلاعاتو او فرهنګ وزارت په بېلابېلو قضیو کې د خبریالانو ترڅنګ و او تل یې هڅه کړې چې رسنۍ اطلاعاتو ته د لاسرسي په برخه کې له ستونزو سره مخامخ نه شي. د دولتي ادارو له چارواکو سره د همغږۍ په موخه د اطلاعاتو او فرهنګ وزارت زوني پروګرام، د دې موضوع یو څرګند دلیل دی.»
په ورته وخت کې غفران د خبریالانو بندي کېدل او پر وړاندې یې د تاوتریخوالي ترسره کېدل د بهرنیو رسنیو منفي تبلیغات بولي او ډاډ ورکوي چې له ټولو ادارو سره خبریالانو ته د اسانتیاوو برابرولو لپاره په اړیکه کې دي.
هغه په دې اړه وايي: « هغه ادعاوې چې د مختلفو آدرسونو له لارې له خبریالانو سره د تاوتریخوالي په اړه خپرې شوې، هېڅ حقیقت نه لري؛ ځکه چې دا ډول وضعیت موجود نه دی. دغو آدرسونو هڅه کړې هغه قضیې هم په خبریالانو پورې وتړلي چې د خبریالانو له کاري ساحې د باندې وې او یا هم خبریالانو په بېلابېلو قضیو کې امنیتي مسایل درلودل او دولت په کې مداخله کړې، هغه یې هم په خبریالانو پورې تړلې دي. حال دا چې داسې څه نه شته او هېڅ یو خبریال د ژورنالېستیکي کارونو په تړاو نه نیول شوی او نه هم نیول کېږي.»
غفران ډاډ ورکوي، که چېرې خبریالانو ته کومه ستونزه ورپېښه شي، د اطلاعاتو او فرهنګ وزارت به له اړوند ارګانونو سره په هغمږۍ، ستونزه هواره کړي.
د نومبر ۲ یمه د خبریالانو پر وړاندې د جرمونو معافیت پای ته رسولو نړیواله ورځ هر کال په دې موخه نمانځل کېږي چې د هغو ننګونو په اړه پوهاوی ډېر شي چې رسنۍ او خبریالان ورسره په خپل مسلکي ژوند کې مخامخ وي.
