په داسې حال کې چې له تېرو دوه نيمو کلونو راهيسې اسلامي امارت واک ته رسېدلی او په افغانستان کې بشپړ امنيت تامين شوی، خو وخت ناوخت د سیمې او نړۍ يو شمېر هېوادونه په افغانستان کې د احتمالي ترهګريزو بريدونو په اړه اندېښنې مطرح کوي.
تازه د اسټرالیا بهرنیو چارو وزارت یو ځل بیا خپلو وګړو ته لارښوونه کړې چې افغانستان ته د احتمالي ترهګريزو بريدونو له امله له سفر کولو ډډه وکړي.
یاد وزارت د خپلو مالوماتو پر اساس ادعا کړې، چې لا هم د کابل په ګډون په ټول افغانستان کې د ترهګریزو بریدونو د ترسره کېدو دوامداره او لوی ګواښونه پر خپل ځای دی.
یاد وزارت زیاته کړې:« د پلازمېنې کابل په ګډون په ټول افغانستان کې د ترهګریزو بریدونو د ترسره کېدو دوامداره او لوی ګواښ لا هم پر ځای دی. استرالیایي وګړي په افغانستان کې د تښتونې او توقیف له جدي ګواښ سره هم مخامخ دي.»
د سیاسي چارو کارپوه محمد سلیم پیګیر وايي: « اسټرالیا په دې خبرو سره یوازې او یوازې دا غواړي، چې خپل ټول هغه جنایتونه چې په تېرو ۲۰ کلونو کې یې په افغانستان کې ترسره کړي هغه پټ کړي.»
د سیاسي چارو کارپوه سرور نیازی وايي: « اوس په افغانستان او په ځانګړې ډول په کابل ښار کې تر بل هر وخت زیات امنیت دی، نه د قدرت هغه جزیرې شته، نه ټوپک سالاران شته، نه غلاوې او نه تښتونې شته او نه هم په هغه کچه ترهګریز بریدونه شته دي.»
د اسټرالیا بهرنیو چارو وزارت نه دي ویلي، چې د ګواښونو دغه راپورونه یې څنګه ترلاسه کړي، خو خپلو وګړو ته یې سپارښتنه کړې، چې افغانستان ته سفر ونه کړي.
د اسلامي امارت ویاند ذبیح الله مجاهد بیا د اسټرالیا دې ادعا ته په غبرګون کې وایي، د افغانستان خاوره د بل هر وخت پرتله امن او هېچاته ترې ګواښ نه شته دی.
مجاهد زیاتوي: « موږ دا ادعاې ردوو، اسټرالیا او نور هېوادونه باید وېره ونه لري. بهرني اتباع چې افغانستان ته راځي او ویزه او پاسپورټ ولري هېڅ ستونزه نشته او د ټولو بهرنیانو لپاره د تګ راتګ، سوداګرۍ او راشې درشې ښه زمینه برابره ده، هېڅ ستونزه نشته ده. په دې اړه چې کومې اندېښنې ښودل کېږي واقعیت نه لري، ښه امنیت او ثبات ټينګ دی.»
د پوځي چارو کارپوهان وایي، اوس مهال په افغانستان کې تر بل هر وخت امنیت تامین شوی او که کوم هېوادونه اندېښنه لري، نو باید شواهد د افغانستان له سرپرست حکومت سره شریک کړي.
د دوی په خبره چې اسټراليا دغه مالومات د پاکستان په وسيله ترلاسه کړي او پاکستان له دې لارې له نړۍ د فنډ راټولولو په هڅه کې دی.
د پوځي چارو کارپوه اختر محمد راسخ وايي:« تاسې ته غوره مالومه ده چې دغه اطلاعات دوی د پاکستان له استخباراتي کړیو له ادرسه یا د اداراتو له ادرسه ترلاسه کوي او پاکستان تل دا دوه مخې لوبې پرمخ وړي.»
په ورته مهال د بریټانیا انډیپنډینټ ورځپاڼې یو راپور ورکړی چې افغانستان په ۲۰۲۴ کال کې د ګرځندوی تر ټولو مشهور هېواد بلل کېږي.
یادې ورځپاڼې د یوه ګرځندوی شرکت لوپاین ټراول په حواله ویلي، افغانستان د سیاحت او سفر لپاره خوندي ځای دی او د دغه شرکت د نوملړ په سر کې ځای لري.
