د کابل او اسلام اباد ترمنځ د اړیکو پراختیا ته هېلې زیاتې شوي.
له اوږد ځنډ وروسته د کابل او اسلام اباد د اړیکو رغولو او پراختیا ته تمې پیدا شوي دي.
د پاکستان او افغانستان د اړیکو رغیدل او له یو بل سره همکاري له هرکلي سره مخ ده.
کابل کې باور دا دی چې دواړه هېوادونه یو بل ته اړتیا لري او پکار ده چې د ښه ګاونډیتوب اړیکې وپالي او له یو بل سره همکارۍ پراخې کړي.
ټینګار دا دی چې دواړه لوري دې له یو سره د دښمنۍ او پر یو بل د تورنو لګیدو پر ځای د اړیکو په پراختیا کار وکړي او پاکستان ته پکار ده چې عملي اقداماتو باندې د باور فضا رامنځ ته کړي.
دا تمې وروسته له هغې پيدا شوې چې د پاکستان لومړي وزیر او افغان ولسمشر په ټلیفوني خبرو کې له یو سره د همکاریو ژمنې تازه کړي او افغان ولسمشر هغه بلنه منلې چې عمران خان اسلام اباد ته د ورتګ لپاره ورکړې ده.
د کورنیو چارو وزارت پخوانی مرستیال میرزا محمد یارمند له اسلام اباد سره د کابل اړیکې هغه مهال ګټورې یادوي چې طالبان اوربند او سولې ته وهڅوي.
د غزني پخوانی والي بیا د کابل او اسلام اباد اړیکې ضروري یادوي او باور لري چې د دواړو هېوادونو له یو بل څخه نه رغیږي.
موسی خان اکبر زاده ټینګار کوي چې له پاکستان سره په ښو اړیکو کې تاوان نشته او د سولې برخه کې همکاریو ته هڅیدلی شي.
د کابل او اسلام اباد اړیکې وروسته له هغې کړکیچنې شوې چې ولسمشر غني له اسلام اباد ځینې عملي اقدامات غوښتل، چې و نه شول، اوس چې یو ځل بیا تمه پيدا شوې چې اړیکې به جوړې شي، تمه شته چې د سیمهییز اتصال د بحث تر څنګ د سولې برخه کې له پاکستان همکاري وغوښتل شي.
