څو ورځې وړاندې د پاکستان کورنیو چارو وزارت وزیر محسن نقوي په یوه خبري کنفرانس کې وويل، د دې هېواد پخواني لومړي وزير عمران خان د ملاتړو په لاریونونو کې افغان کډوال هم موجود وو او ان ځينې يې نيول شوې هم دي.
له دې سره، د پاکستان بهرنيو چارو وزارت وياندې ممتاز زهرا بلوچ هم ورته ادعا کړې او ويلي يې دي چې د عمران خان په پلوۍ لاريونونو کې د نيول شویو افغانانو هويت به په راتلونکو ورځو کې په ډاګه شي.
خو په اسلام آاباد کې د افغانستان سفارت دا ادعا بې بنسټه بللې او وايي، په پاکستان کې مېشت افغان کډوال په هېڅ سياسي او يا هم جرمي مسايلو کې لاس نه لري.
د سفارت له لوري په خپره شوې اعلاميه کې ويل شوي، په پاکستان کې مېشتو افغانان د سوله ييز ژوند له لارې د دې هېواد په اقتصاد کې مثبته ونډه لرلې ده.
د اعلامیې یوه برخه: « افغان کډوال په پاکستان کې په هېڅ ډول سیاسي لوبو کې ښکېل نه دي او نه يې په کومو جرمي پېښو کې لاس لرلی. هغوی همېشه سوله يیز ژوند کړی، د پاکستان په اقتصاد کې يې مثبته ونډه لرلې. افغان کډوال چې لا له وړاندې د پاکستان د تېر موقت حکومت له وخته را پیل شويو پالېسیو له امله له محدودیتونو او وېرې سره مخ دي، هېڅکله نه غواړي چې په سیاسي لوبو او ناندریزو احتجاجونو کې ځان ښکېل کړي.»
اعلامیه کې د پاکستان له حکومته غوښتل شوې چې د افغان کډوالو پر وړاندې د بې باورۍ داسې فضا رامنځته نه کړي چې د دوی ځورونې، بدنامۍ او جبري بې ځایه کېدو لامل شي.
په ورته وخت کې د سیاسي چارو کارپوهان وايي، پاکستان اوس په سیاسې، اقتصادې او امنیتي برخو کې د بېوزلۍ وروستي حد ته رسېدلی او د خپلو ناکامیو پړه پر افغانانو اچوي.
دوی زياتوي، سرپرست حکومت دې د پاکستان پر وړاندې جدي دریځ ونيسي او د هر تور پورې کولو ځواب دې ورکړي.
د سیاسي چارو کارپوه اختر محمد راسخ وايي: « دوی غواړي د دغو ویناګانو په وسیله نړۍ ته وښيي چې دا افغانستان او افغانان دي چې زموږ په کورنیو چارو کې لاسوهنه کوي؛ خو داسې نه ده بلکې خبره برعکس ده. د پاکستان له جوړېدو راهیسې د پاکستان حکومت، نظامیان او سیاستوال د پنجاب له آدرسه د افغانستان د تباهۍ، بربادۍ، د نظامونو چپه کولو او زموږ د هویت بدنامولو لپاره پر نړیواله کچه عملي کار کړی.»
ځینې نور بیا وايي، اوس د دې وخت رارسېدلی چې لر او بر افغانان له سرپرست حکومت سره پر ګډه د پاکستان د ناوړه کړنو پر وړاندې ودریږي او د دې اجازه ورنه کړي چې پاکستان په افغانستان کې خپلو موخو ته ځان ورسوي.
د سیاسي چارو کارپوه توریالی ځاځی وايي: « د پاکستان په خبرو باور کول یوه لویه تاریخي تېروتنه ده. ټول افغانان باید د دې هېواد په هکله سره یو لاس شي، ترڅو په راتلونکي کې ونه شي کولی افغانستان د خپلو درواغو او سیاسي موخو قرباني کړي.»
له دې ټولو سره سره، په اسلام آباد کې د افغانستان سفارت خبرداری ورکړی چې ورته ادعاوې به د دواړو ګاونډیو هېوادونو ترمنځ بې باوري نوره هم زیاته کړي.
