د افغانستان اسلامي امارت د «ډنیس کویل» په نوم یو تن امریکايي تبعه چې د تېرکال په جنوري میاشت کې نیول شوی و، سې شنبه له بنده ازاد کړ.
بهرنیو چارو وزارت وايي، دا امریکايي تبعه د افغانستان د نافذه قوانینو د نقض په تور نیول شوی و او د اسلامي امارت له مشرتابه څخه د نوموړي د کورنۍ له غوښتنې او د سترې محکمې له حکم وروسته ازاد شو.
د بهرنیو چارو وزارت مرستیال ویاند وايي، باور دا دی چې دغه ګام به د دواړو هېوادونو ترمنځ د باور فضا پیاوړې کړي او په راتلونکي کې به د تفاهم او رغنده خبرو اترو له لارې شته ستونزو ته حللارې وموندل شي.
ضیاء احمد تکل زیاته کړې: « د افغانستان اسلامي امارت دا اقدام د بشري خواخوږۍ او نېک نیت پر بنسټ ترسره کوي او باور لري چې دا ډول ګامونه کولی شي د هېوادونو ترمنځ د باور فضا لا پیاوړې کړي. همداراز هیله څرګندوي چې دواړه هېوادونه به په راتلونکي کې د تفاهم او رغنده خبرو اترو له لارې پاتې ستونزو ته د حل لارې ومومي.»
بله خوا، د افغان سولې لپاره د امریکا پخوانی ځانګړی استازی چې د همدې ستونزې په تړاو افغانستان ته راغلی و، د ډنیس کویل ازادېدل د اسلامي امارت پرځای او سمه پرېکړه بولي.
زلمي خلیلزاد په دې اړه رسنیزه غونډه کې د اسلامي امارت دغه ګام د افغانستان او امریکا ترمنځ په اړیکو کې مثبت پرمختګ یاد کړی.
خلیلزاد په دې اړه ویلي: « زه ډېر خوښ یم چې نن ورځ په ځانګړې توګه دلته له تاسو سره یم. زما د خوشالۍ دلیل دا دی چې یو امریکايي تبعه چې دلته بندي و، نن له بنده خوشي شوی او خپل کور او خپل هېواد امریکا ته ځي. زه د نوموړي خوشي کېدل یوه ښه فیصله بولم.»
همدارنګه، د محمد رحیم الافغاني په نوم د هغه افغان تبعه کورنۍ چې له تېرو نږدې ۲۰ کلونو راهیسې د امریکا په بند کې دی، د ډونالډ ټرمپ له حکومت څخه هم د نوموړي د ازادېدو غوښته کوي.
د نوموړي زوی له رسنیو سره په خبرو کې وايي، د امریکا له اوسني حکومت څخه هم د ورته ګام تمه لري او زیاتوي چې د خپل پلار د ازادېدو په تړاو یې د زلمي خلیلزاد په لاس د امریکا حکومت ته لیک هم استولی.
محمدابراهیم الافغاني وايي: « زما پلار له ۱۹ کالو راهیسې په ګوانتانامو زندان کې پروت دی، حال دا چې هېڅ ډول جرم نه لري. اسلامي امارت نن د امریکا یو بندي ورخوشي کړ او خپلې کورنۍ ته لاړ؛ موږ د امریکا له حکومت غواړو چې زموږ پلار هم راخوشي کړي.»
اسلامي امارت د ډینس کویل په نوم امریکايي تبعه داسې مهال له بنده ازادوي چې تر دې وړاندې یې هم د رایان کوربټ او جورج ګلېزمن په نومونو دوه امریکايي بندیان د قطر په منځګړیتوب له بنده ازاد کړي و.
څو ورځې وړاندې د امریکا ولسمشر د معاون مرستیال سباسټین ګورکا په یوه ټویټ کې له افغان حکومت څخه په جدي ډول د ټولو امریکايي اتباعو د ازادېدو غوښته مطرح کړې وه او د څلورو دغو بندیانو نومونه یې هم ذکر کړي و چې یو په کې افغاني الاصله امریکایي محمود حبیبي و.
