د روسیې په کوربه توب د کازان اقتصادي فورم ۱۶ مه ناسته د دې هېواد په کازان ښار کې د روانې مې میاشتې پر ۱۳ مه پيل کېږي او درې ورځې به دوام ولري.
د روسیې ټاس دولتي خبري آژانس د راپور له مخې، په دې ناسته کې چې معمولا د روسیې او اسلامي نړۍ د اقتصادي، علمي او فرهنګي برخو کې د فعالیتونو پر ګډې همکارۍ متمرکز وي،۱۶ مه ناسته کې به یې ډېر ټینګار د برېښنايي سیسټمونو پر پیاوړي کولو او پراختیا وي.
د افغانستان اسلامي امارت مسوولین وايي، د کازان په دې مهمه ناسته کې د سرپرست حکومت په استازیتوب د ریاست الوزرا اقتصادي مرستیال ملاعبدالغني برادر اخوند پر مشرۍ یو پلاوی ګډون کوي چې د سوداګرۍ او ټرانسپورټ وزارتونو سرپرستان او دغه راز د بهرنیو چارو وزارت استازي به یې هم برخه وي.
د اسلامي امارت مرستیال ویاند حمد الله فطرت وايي، د دې ناستې په څنډه کې د افغانستان او روسیې ګډه سوداګریزه ناسته هم پلان شوې او تمه ده چې دواړه خواوې به پر مهمو مسایلو بحثونه ولري.
فطرت په دې اړه وايي: « د کازان فورم چې د اسلامي نړۍ او روسیې ترمنځ د اقتصادي همکاریو او هر اړخیزو اړیکو په پراختیا کې مهم رول لري، یوه مهمه ناسته ده او راتلونکې غونډه یې د مې پر ۱۳ پیلېږي. په دې کې به د اسلامي امارت د ریاست الوزرا د اقتصادي مرستیال ملاعبدالغني برادر اخوند پر مشرۍ او د صنعت او سوداګرۍ، ټرانسپورټ او هوايي چلن وزارتونو د وزیرانو په شمول، کرنې او مالدارۍ، کاونو او پټرولیم او خارجه وزارتونو د استازو په غړیتوب یو لوړ رتبه پلاوی ګډون وکړي. د اسلامي امارت دغه لوړ پوړی پلاوی به په دې فورم کې د ګډون ترڅنګ په یوه بله اقتصادي ناسته کې هم ګډون وکړي چې د افغانستان او روسیې پر ګډو اقتصادي او تجارتي اړیکو به په کې خبرې وشي.»
د ټاس په راپور کې دغه راز د افغانستان لپاره د روسیې د ولسمشر ځانګړي استازي ضمیر کابلوف له قوله راغلي چې د روسیې او افغانستان اقتصادي غونډې مشري به د روسیې د لومړي وزیر مرستیال وکړي.
د کابلوف په خبره، د دواړو هېوادونو د سوداګریزې ناستې تر څنګ به د افغاني تولیداتو یو نندارتون هم جوړ شي.
د ټاس خبري اژانس د راپور یوه برخه کې راغلي: « د افغانستان او روسیې د سوداګرۍ ناسته به د کازان فورم په څنډه کې ترسره شي. د دې ناستې مشري به د روسیې لومړي وزیر مرستیال الکسي اورچوک وکړي او د دې ترڅنګ به د افغاني تولیداتو یو نندارتون هم وړاندې شي.»
اسلامي امارت د کازان فورم پر ۱۵ ناسته کې هم ګډون کړی و چې ۱۶ مې ناستې ته یې پر لوړه کچه پلاوی له وړاندې ور بلل شوی دی.
د اقتصادي چارو کارپوهان په سیمه کې د کازان ناستې هر اړخیز اقتصادي اهمیت ته په کتو په دې فورم کې د سرپرست حکومت د استازو ګډون مهم او ګټور بولي او په باور یې، دا ډول ناستو کې ګډون به د مسکو او کابل اقتصادي همکارۍ لا پیاوړې کړي.
د اقتصادي چارو شنونکی نورالله عزیز وايي: « په اوسنیو شرایطو کې هر اقتصادي فورم د افغانستان لپاره ډېر اړین دی، ځکه له دې فورم یوازې دا چې افغانستان سیاسي ګټه پورته کولی شي، بلکې کولی شي اقتصادي، تجارتي، ټرانزیټي او نورې ګټې هم پورته کړي. د کازان دغه فورم نه یوازې دا چې د افغانستان لپاره په اقتصادي لحاظ مهم دی، بلکې کولی شي د نړیوالو سیاسي، اقتصادي او نورو ملاتړونو څخه هم په دې فورم کې کار واخلي.»
د کازان لومړنۍ ناسته په ۲۰۰۹ زېږدیز کال ترسره شوه.
د دې ناستې په ګډونوالو کې د روسیې لوړ پوړي چارواکي، د اسلامي نړۍ استازي او د غړیو هېوادونو په مالي او سوداګریزه برخه کې د سترو شرکتونو او کمپنیو استازي شامل دي.
د روسي رسنیو د راپورونو له مخې، په ۲۰۲۵ زېږدیز کال د کازان پر ۱۶ فورم ناسته کې شاوخوا۵۰ سترې اقتصادي هوکړې لاسلیک شي.
