اسلامي امارت د ټاپي پروژې امنیتي طرحه له ترکمنستان سره شریکه کړې

د افغانستان د کورنیو چارو وزارت له لورې په یوه خپره شوې خبرپاڼه کې ویل شوي، د کورنیو چارو او ملي دفاع وزارتونو استازو د ترکمنستان له سفیر خواجه عوض اوف او د ټاپی پروژې له اجرائیه مشر مایرات امان اوف سره د ټاپي پروژې په تړاو ناسته کړې او د دغې پروژې پر امنیتي طرحه یې خبرې کړې دي.

په دې کتنه کې د دفاع او کورنیو چارو وزارتونو مسوولینو په افغانستان کې د ټاپي پروژې د امنیتي پلان په اړه ترکمنستاني چارواکو ته مالومات ورکړي دي.

د ترکمنستان چارواکو ویلي،د ټاپي د ګازو نل لیکې عملي کار په ترکمنستان کې پای ته رسیدلی دی او ټاکل شوې ده،چې د دې پروژې عملي کار په نږدې راتلونکې کې په افغانستان کې پیل شي.

ټاپي هند او پاکستان ته د افغانستان له لارې د ترکمنستان د ګازو د لېږد پروژه ده،چې په ۲۰۱۶ زېږدیز کال کې د افغانستان،پاکستان،ترکمنستان او هندوستان چارواکو پرانېستله.