د قطر او ترکیې پلاوو د کابل نړیوالهوايي ډګر په ګډون د څلورو نورو هوايي ډګرونو د ساتنې او مدیریت کولو پر سر د اسلامي امارت له چارواکو سره مذاکرات پیل کړي دي.
د ترکیې او قطر د پلاوي له راتګ وروسته اسلامي امارت وایي، په دې اړه له کوم هېواد سره هوکړې ته نه دي رسېدلي،خو هڅه کوي د هېواد هوایي ډګرونه په میعاري کچه فعالیت ته چمتو شي.
د اسلامي امارت د ویاند مرستیال بلا کریمي وایي:« په دې اړه اړه کوم توافق او پرېکړه نه ده موجوده. اسلامي امارت په دې هڅه کې ده،چې هوایي ډګرونه سټنډرد او لا میعاري شي،خو تر اوسه له چاسره کوم توافق پرې نه ده راغلی.»
له دې سره د ترانسپورت او هوايي چلن وزارت په یوه خبرپاڼه کې ویلي، د فرانسې هېواد درې پايي رادار د یکشنبې پر ورځ دوی ته په کابل هوایي ډګر کې ته تسلیم شوي دي.
د مالوماتو پر اساس د سرتاسري رادرا ځای پر ځای کولو تړون د ۱۱۲ میلیون یورو په ارزښت د تالس په نوم یوه فرانسوي شرکت سره شوی دی.
د ترانسپورت او هوايي چلن وزارت ویلي، د دغه قرارداد پر اساس به یاد رادارونه د کابل،بلخ او هرات په هوايي ډګرونو کې ځای پر ځای کړل شي.
