نړیوال بانک په خپل راپور کې د افغانستان اقتصادي پرمختګ ترڅنګ، د انفلاسیون کمښت خبر هم ورکړی.
راپور کې راغلي چې کارکوونکو ته په وخت امتیازات ورکړل شوي او د افغانیو ثبات د نورو پولي واحدونو پر وړاندې څو برابره زیات شوی.
د نړیوال بانک راپور یوه برخه :« د روان کال پیل څخه د اګست تر ۲۴مې نېټې پورې د افغانیو ارزښت د نورو اسعارو پر وړاندې زیات شوی. روان کال کې د بانک څخه د پيسو ترلاسه کولو کچه له ۳۰۰۰۰ افغانیو څخه ۵۰۰۰۰ افغانیو ته لوړه شوه، خو اوس هم ځینې محدودیتونه شته. سلګونو ښځینه او نارینه کارکوونکو سره د تلیفون له لارې مرکې شوي او نږدې ټولو د ۲۰۲۳ کال په جولای میاشت کې خپل معاشونه ترلاسه کړي. تیرکال لومړیو پنځه میاشتو په پرتله عواید ۸سلنه زیات شوي.»
نړیوال بانک داسې مهال د افغانستان اقتصادي ودې په اړه راپور خپروي چې په کور دننه او نړیوال مارکیټ کې د ډالرو او پاکستاني کلدارو پر وړاندې د افغانیو ارزښت څو برابره زیات شوی دی.
دریاست الوزرا اقتصادي مرستیالۍ د نړیوال بانک وروستی راپور ریښتینولی بللی او دا يې د روان اقتصادي بهیر اصلي انځور یاد کړی.
یادې مرستیالۍ زیاته کړې:« د نړیوال بانک له لوري د افغانستان اقتصاد په اړه وروستی راپور ستایو چې د انفلاسیون کچې ټیټېدو، په کوردننه خوراکي توکو تولید زیاتوالي، بهرنۍ اسعارو پر وړاندې د افغانیو ارزښت لوړېدل او د کاري فرصتونو زیاتوالی په کې یاد شوي، دا راپور د پرمختګونو عیني واقیعت دی چې دې بانک وړاندې کړی دی.»
اقتصادي مرستیالۍ د راپور ستاینې ترڅنګ له نړیوال بانک غوښتنه کړې چې په افغانستان کې د دوی له لورې تمویلېدونکي پروژې بېرته پیل کړي.
یادې مرستیالۍ زیاته کړې:« ټول نړیوال سازمانونه دې نړۍ ته د افغانستان روان پرمختګونه په سمه توګه وړاندې کړي. اسلامي امارت له نړیوال بانک څخه غواړي، هغه پروژې چې د دې بانک له لوري تمویلېږي او اوس یې کارونه نیمګړي دي بېرته پیل کړي.»
نړیوال بانک په خپل راپور کې یادونه کړې چې د غیر رسمي مالوماتو له مخې، له جنورۍ تر جولای میاشتې پورې د صادراتو کچه ۰.۹۱ میلیارده افغانۍ وه، چې د تیر کال پرتله ۴۹ سلنه زیاته شوې چې ډېری ایران، پاکستان، چین او هند ته شوي دي.
