اسلامي امارت: د ملګرو ملتونو ناستې ته د افغان استازي نه وربلل له افغانستان سره جفا ده

ملګرو ملتونو د طالبانو او نه هم د تیر حکومت استازي ته اجازه ور کړه،چې د افغانانو پر استازولۍ عمومي ناستې ته وینا وکړي.

 د افغانستان اسلامي امارت  د فرهنګني کمېسیون غړی انعام الله سمنګاني  وايي، د ملګرو ملتونو پر پرېکړه خوښ نه دي او د افغانستان په حق کې یې جفاء بولي.

سمنګاني وايي:« ناسمو سیاستونو افغانانو ته اجازه ورنه کړه،چې هغوی هلته حضور ولري، په داسې حال کې چې افغانان له بېلابېلو ستونزو سره لاس او ګریوان دي،باید افغانانو ته فرصت ورکړل شوی وه،ترڅو خپلې له یوه رسمي او دولتي ادرسه نړیوالو ته وړاندې کړي. نړیوال باید په دې پوه شي،چې افغانستان کې څه تېریږي او د دوی غږ اورېدل شوی وای،دا چې د افغانانو غږ وا نه ورېدل شو دا د افغانستان په حق کې جفاء ده.»

اخوا ملګرو ملتونو کې د افغانستان تېر حکومت  سفیر بیا ویلي، د هېواد د ملي ګټو لپاره له خپلې وینا تیر شوی دی.

د طالبانو د شلو کلونو پخوانی ګډون هم په ملګرو ملتونو کې جنجالي وه.

د سیاسي چارو شنونکي له نړیوالو غوښتنه  کوي، چې د افغانانو له منځه یې یو کس منلی و، چې د افغانانو د ستونزو او کړاونو په اړه یې غږ پورته کړی وه. 

د سیاسي چارو شنونکی اجمل سهیل وايي:« اوس باید پرر دې  کوښښ وشي،چې نړیوال دې ته راضي کړو،چې د افغانستان د ملت یو استازی لاړشي او دا استازی په نړیوالو ناستو او ملګرو ملتونو غونده کې برخه واخلي،ترڅو د افغانانو د ستونزو او کړاو مسایل مطرح کړي. بلاخره نړیوال باید اړ  کړای شي،چې پخواني حکومت او هم اوسني حکومت په دوی تپل شوی او د دوی د ګټو استازولي نه شي کولای.»

شنونکي ټېنګار کوي،چې نوی استازی ملګرو ملتونو کې قبول شي او ملګري ملتونه هم باید سفیر د خپل غړي په توګه ومني.

دوی وايي، د نړیوالو غوښتنه افغانستان کې د سیاسي مشارکت راتګ دی او دې سره باید افغانان عیار شي.

 د سیاسي چارو شنونکی طارق فرهادي  وايي:« داچې د ملګرو ملتونو په ناسته کې د تېر حکومت سفیر خبرې ونه کړې، دا ښه و په دې خاطر چې ملګري ملتونه پوهېدل هغه د یو خیالي حکومت نمایندګي کوي،چې حضور نه لري. اوس باید نوی استازی ملګرو ملتونو کې قبول شي او ملګري ملتونه هم باید سفیر د خپل غړي په توګه ومني،ترڅو سیاسي مشارکت راشي،چې دا د نړیوالو غوښتنه هم ده باید ورته عیار شو.»

داچې د ملګرو ملتونو په ناسته کې د افغانستان استازولي نه وه په دې اړه غبرګونونه سره وېشلي دي.

یو شمېر یې اړتیا بولي،چې افغانستان په سختو سیاسي او اقتصادي ستونزو کې راګیر دی، خو له بل پلوه باور دا ده،چې د ملګرو ملتونو پرېکړې اجرایوي نه دي.

له څه باندې  شلوکلونو راپه دېخوا دا لومړی ځل دی،چې د ملګرو ملتونو ناسته کې افغانستان استازی نه لري.