وروسته له له هغه چې په بریکس سازمان کې د افغانستان د غړيتوب په تړاو راپورونه خپاره شول، اسلامي امارت هم ومنله چې دې سازمان کې یې د غړيتوب وړانديز روسيې ته سپارلی دی.
په دې اړه خپاره شویو راپورونو کې ويل شوي چې د اسلامي امارت دغه وړانديز د صنعت او سوداګرۍ وزارت سرپرست په وسيله کرېملین ماڼۍ ته سپارل شوی، ترڅو ولسمشر پوتين ته ورسېږي.
اسلامي امارت د دې وړانديز د تایید ترڅنګ لېوالتيا ښيي چې غواړي د افغانستان اقتصادي ثبات په موخه د بریکس سازمان فعال غړی شي او استازي يې د دې سازمان په ناستو کې ګډون وکړي.
د اسلامي امارت مرستيال وياند حمدالله فطرت وايي: « بریکس یو مهم اقتصادي فورم دی او په کې د نړۍ د سترو منابعو او اقتصادي سرچینو لرونکي هېوادونه غړیتوب لري. له دې امله چې افغانستان یو مخ پر ودې او د اقتصادي پراختیا په حال کې هېواد دی، نو زموږ لپاره مهمه ده چې د دغه شان یوه اقتصادي سازمان په ناستو کې حضور ولرو. د افغانستان اسلامي امارت لېوالتیا لري چې د بریکس په راتلونکې ناسته کې ګډون وکړي او د همدې لپاره یې له کوربه هېواد سره خپله غوښتنه شریکه کړې ده.»
د سیاسی چارو شنونکي د اسلامي امارت له خوا بریکس سازمان ته د غړيتوب وړانديز غوره ګام بولي. د دوی پر باور، افغانستان به د سیمې او نړۍ پر کچه په اقتصادي ناستو کې له ګډون سره پر ځان نورې سوداګريزې لارې هم پرانيزي.
د سیاسي چارو شنونکی صادق حمیدزوی وايي: « له بریکس سره وصل کېدل د افغانستان د ګټو پر خلاف نه بلکې د مفاداتو پر تضمین راڅرخي. په بریکس کې داسې هېوادونه شته چې له امریکا سره ستراتیژیک تعاملات لري خو د دې سازمان غړي هم دي. د بریکس غړیتوب د افغانستان پر ګټه دی نه په زیان.»
د سیاسي چارو شنونکی ادریس محمدي ځاځی وايي: « بریکس په اوسنیو شرایطو کې تر ټولو مهم ارګان یا سازمان او کنفرانس یې تر ټولو مهم کنفرانس دی. که چېرې اسلامي امارت ته په دې کنفرانس کې بلنه ورکړل شي یا هم د دې سازمان غړیتوب ورکړل شي، دا به د اسلامي امارت لپاره تر ټولو ستره لاسته راوړنه وي.»
د شنونکو په باور، که د بریکس سازمان په راتلونکو ناستو کې اسلامي امارت ته بلنه ورکړل شي، په دې سازمان کې د خپل ځای په يقيني کولو سره کولی شي چې له غړيو هېوادونو سره سوداګري نور هم پراخه کړي.
د سیاسي چارو شنونکی یونس ځدارڼ وايي: « په دې کنفرانس کې د افغانستان ګډون ډېر مهم دی، د افغانستان اقتصاد ته به ډېرې مهمې پایلې ولري او زموږ د ملي کرنسۍ ارزښت به نور هم لوړ کړي.»
برازیل، روسیه، هندوستان، چین او جنوبي افریقا د بریکس سازمان دایمي غړي او بنسټ اېښودونکي دي، مصر، ایتوپیا، ایران او عربي متحده امارات هم په ۲۰۲۴ کال له دې سازمان سره یوځای شول.
د دې سازمان په اهدافو کې د يوه اقتصادي بلاک په چوکاټ کې د غړيو هېوادونو مطرح کول، له یوبل سره د سوداګرۍ ډېرول، د ډالرو پر ځای په خپلو اړوند کرنسیو تجارت کول، پر اروپايي ټولنې او امریکا متحده ایالتونو اتکا کمول او دغه راز د یوه لوی پراختیايي بانک جوړول شامل دي.
