Skip to content
د اسلامي امارت د ملګرو ملتونو امنیت شورا له هغې پرېکړې،چې له مخې یې مشران د درېیو نورو میاشتو لپاره سیاسي سفرونه کولای شي، هرکلی کوي.
د اسلامي امارت د ویاند مرستیال انعام الله سمنګاني همداراز له ملګرو ملتونو او امریکا غوښتي،چې د دوحې د هوکړې په بنسټ دې د دوی د مشرانو نومونه له تور لیسته وباسي.
سمنګاني زیاته کړه: «موږ د ملګرو ملتونو د امنیت شورا د دې پریکړې چې د اسلامي امارت د مقاماتو د سفرونو په تړاو یې کړې هرکلی کوو،خو لازمه ګڼو،چې د دوحې د هوکړې پر اساس باید د اسلامي امارت د چارواکو نومونه د امریکا دمتحده ایالانو د ملګرو ملتونو له تورو لیستونو حذف شي.»
کارپوهان بیا د ملګرو ملتونو دغه پریکړه د اسلامي امارت لپاره یو فرصت ګڼي،چې پر وینا یې باید د افغانستان د بیا رسمیت پیژندنې لپاره ترې ګټه واخلي.
د مشرانو جرګې مخکینی غړی هاشم الکوزی وايي: «طالبانو ته هم په کار ده،چې د ملګرو ملتونو، ناټو او نورو هېوادونو خپلې ستونزې د تورلیستونو په برخه کې دي او یاهم د رسمیت پیژندنې په برخه کې باید حل یې کړي او له دغو درېیو میاشتو د فرصت په توګه ګټه واخلي.»
ځینې بیا په دې باور دي،چې د لنډ مهال لپاره د دغو تحریمونو د لرې کیدو موخه په افغاسنتان کې د ټول شموله حکومت رامنځ ته کیدل دي،هغه څه چې نړیوال یې غواړي.
د سیاسي چارو کارپوه طارق فرهادي وايي: «دا تحریمونه په موقت ډول لري شوي دي. د دې لپاره چې طالب رهبران وشي کولای،چې سفر وکړي او نورو افغاني لورو سره لیدنې ولري، د دې لپاره چې همه شموله حکومت په توګه وپیژندل شي.»
د اسلامي امارت مشرانو د سفرونو جواز د روانې ډیسمبر میاشتې په ۲۳ نیټه پایته رسیدلی و، خو اوس تازه د ملګرو ملتونو امنیت شورا د دغو سفرونو جواز تر راتلونکو درېیو میاشتو تمدید کړ.
