په دې وروستیو کې په خواله رسنيو یوه ویډیو لاس په لاس کېږي، چې په کې ښکاري د سېد مهدي موسوي په نوم افغان ځوان د ايراني پوليسو له نيول له نيول کېدو وروسته په زور په ځمکه څملول شوی او په عام محضر کې شکنجه کېږي.
بهرنيو چارو وزارت د يوې خبرپاڼې په خپرولو سره په ايران کې د افغانانو پر وړاندې روان ناوړه چلن غندلی او له دې هېواد يې غوښتي چې د کډوالو په پر وړاندې خپل چلن له اصولو سره سم برابر کړي.
سرپرست حکومت له کډوالو سره د ايراني ځواکونو دغه ډول چلن له ټولو انساني اصولو سره په ټکر کې بولي او د غندنې ترڅنګ له ايراني چارواکو د دغه ناوړه چلند د درولو غوښتنه کوي.
د اسلامي امارت وياند ذبيحالله مجاهد وايي: « د افغانستان اسلامي امارت په ایران کې له مهاجرو سره وروستی چلن غندي او له ایراني چارواکو غوښتنه کوی چې د دې ډول خپلسرو حلقاتو پر وړاندې قاطع ګامونه پورته کړي، له کډوالو سره له زغم کار واخلي او د ځورونې لړۍ یې پای ته ورسوي.»
له افغان کډوالو سره د ايراني پوليسو د ناوړه چلن وېډيوګانو پر عامو خلکو سربېره د سرپرست حکومت د بهرنيو چارو وزارت پاملرنه هم جلب کړې او د رسمي اعلاميې په خپرولو سره یې په دې اړه غبرګون ښودلی.
د دې وزارت په اعلاميه کې ورته چلن د کابل او تهران ترمنځ د اړيکو په زيان بلل شوی او په کې له ايراني چارواکو غوښتل شوي چې له سید مهدي موسوي سره شوي چلن په اړه د پلټنو پايله له کابل سره شريکه کړي.
د بهرنیو چارو وزرات مرستیال ویاند احمد ضیا تکل وايي: « په ایران کې له افغان کډوالو سره د ایراني پولیسو دغه ډول ناوړه چلن د افغان حکومت اندېښنه را پارولې ده. متعصبې ډلې هڅه کوي چې له دې ډول پېښو څخه په ګټنې د دواړو هېوادونو ترمنځ مثبتې اړیکې زیانمنې کړي.»
ايراني چارواکي دا نه مني، چې دغه هېواد کې له افغان کډوالو سره د پوليسو له لوري ناوړه چلن شوی وي او په دې اړه خپاره شوي راپورونه د هغو کړيو کار بولي چې په خبره يې د کابل او تهران د اړيکو خرابولو ته یې مټې رانغښتې دي.
له بلې خوا، د ایران بهرنیو چارو وزارت مرستیال سید رسول موسوي هم دغه پېښه غندلې خو په ورته حال کې له افغانانو سره د ناوړه چلن مستندو وېډيوګانو پر خپرېدو سترګې پټوي او وايي، په ایران کې افغان کډوال په هېڅ صورت نه دي ځورول شوي.
هغه زیاتوي:« ایران کې هېڅ چارواکی او بنسټ د کډوالو ځورول نه مني او دا د اسلامي ورورلۍ له سنت او د مېلمه پالنې دود خلاف ګڼي. د کډوالو ځورول د بهرنیانو پروژه ده، خو لکه څرنګه چې ايراني وګړي د ایران د قوانينو پر منلو مکلف دي، بهرني وګړي هم باید د ایران قوانین او مقررات ومني.»
د سیاسي چارو کارپوهان په ايران کې له افغانانو سره اوسنی چلن تازه نه بولي او وايي، له دې وړاندې هم په وار وار افغان کډوال د ايراني ځواکونو له لوري ځورول شوي دي.
دوی له ايران غواړي د افغان کډوالو پر وړاندې دې نرم چلن غوره کړي او په دې توګه نړيوالو اصولو ته ځان ژمن ثابت کړي.
د سیاسي چارو شننونکی فیض محمد ځلاند وا « ایران د افغانستان د یوه ګاونډي هېواد په توګه مسوولیت لري چې له افغان کډوالو سره نېک بشري، اسلامي او د ګاونډیتوب سلوک او چلن وکړي. خو اوسمهال داسې ښکاري چې ایران هم د پاکستان په شان د افغان کډوالو د ځورولو، ماتولو او بې عزته کولو په لارې ګامونه اخلي او په دې سره پر افغان ولس د فشار راوړلو هڅه کوي.»
يوازې ايران نه بلکې پاکستان، ترکیې او یو شمېر نورو هېوادونو هم پر خپلو خاورو مېشتو افغانانو سره چې د اوسېدولو قانوني اسناد لري، ناوړه چلن پيل کړی او له خپلې خاورې يې په زور د افغانانو شړلو لړۍ هم له څو مياشتو راهيسې پيل کړې ده.
