ټاکل شوې د ملګرو ملتونو امنیت شورا راتلونکې اوونۍ د افغانستان وضعیت او له پاکستان سره يې د روان کړکېچ په تړاو د یوې ناستې کوربه توب وکړي.
د اسلامي امارت مرستیال ویاند کابل کې د خبري کنفرانس پرمهال د دې ناستې د اهمیت په تړاو د یوې پوښتنې په ځواب کې وايي، په نړیوالو مسایلو کې د دې شورا دریځ نیونې ته په کتو، تمه نه کېږي چې د افغانستان په تړاو مثبتې پرېکړې وکړي.
فطرت د ترسره کېدونکې ناستې پرېکړې او اغېزمنتیا له دې امله بې ګټې بولي چې په خبره يې، يادې شورا دا مهال په ځينو نړيوالو قضيو کې د کمزوري رول لوبولو له امله خپل ارزښت له لاسه ورکړی.
د اسلامي امارت مرستیال ویاند حمدالله فطرت وايي: « متأسفانه د ملګرو ملتونو امنیت شورا خپل ارزښت او اعتبار له لاسه ورکړی او په ځانګړې توګه د افغانستان په ارتباط ښه نظر نه لري. نو، موږ ډېر تمه او امید نه لرو چې په دې ناسته کې به رغنده موقف ونیول شي.»
د شنونکو په باور، د امنیت شورا پر اهمیت شکونه او بې باوري وروسته له هغې ډېره شوه چې دغې شورا په تېرو څه باندې څلورو کلونو کې ډېر کله د افغانستان پر وړاندې موقف نیولی او په ناستو کې یې د اوسني حکومت په سیاستونو او پالیسیو تندې نیوکې شوې دي.
دوی زياتوي، يادې شورا پر افغان خاورې د پاکستان پوځي رژیم د تېري په تړاو هم چوپتیا غوره کړې او په تېرو څو ورځو کې یې ناڅرګنده او غیراعلان شوې دریځ نیونه کړې.
د سیاسي چارو شنونکی اخترمحمد راسخ وايي: « کوم نظامي وضعیت چې همدا اوس د ګاوډیو هېوادونو له خوا پر موږ تپل شوی، که چېرې دوی د منځګړیتوب لپاره را ودانګي، دا به زموږ په خیر وي او که چېرې له اسلامي امارت سره د رسمیت پېژندلو لاره ونیسي، دا به هم د افغانستان په ګټه وي.»
د دې خلاف، کابل کې د ملګرو ملتونو سیاسي استازولۍ(یوناما) په خپره کړې اعلامیه کې پر افغانستان د پاکستاني پوځي رژیم پوځي تیری غندلی او د افغان حکومت په ګډون یې له دواړ لورو د جګړې درېدو غوښتنه کړې.
د شنونکو په باور، په ملګرو ملتونو کې د اوسني حکومت د استازي نه شتوالی د دې سازمان او د اړوند شوراګانو پر ناستو کې پر کېدونکو پرېکړو د باور پيکه کېدو لامل شوی.
د سیاسي چارو شنونکی روحالله هوتک وايي: « افغانستان ته په ملګرو ملتونو کې خپله څوکۍ نه ده ورکړل شوې او په دې برخه کې سپارښتنې دا دي چې د افغانستان اسلامي امارت مخامخ ابعاد شریک کړي او خپلې ستونزې حل کړي.»
دا هرڅه داسې مهال دي چې د ملګرو ملتونو امنیت شورا به د روانې مارچ میاشتې په ۱۷مه نېټه یوه بله ناسته هم ولري چې په کې به په افغانستان کې د یوناما د کاري مودې اوږدولو یا تړلو پرېکړه وشي.
