ریچارډ بېنېټ د ۲۰۲۲ کال په مې میاشت کې د ملګروملتونو د بشري حقونو سترې شورا له خوا د بشري حقونو په برخه کې د افغانستان لپاره ځانګړی راپور ورکوونکی وټاکل شو.
هغه د خپل ماموریت په موده کې څو ځلې افغانستان ته سفرونه کړي او له کابل سربېره یې له ډېرو ولايتونو د معلوماتو راټولولو په موخه ليدنې وکړې.
د اسلامي امارت ویاند ذبیح الله مجاهد د جرمني دویچ ویله رسنۍ سره په یوه مرکه کې ادعا کړې، چې ريچارډ بېنېټ د افغانستان بشري حقونو په اړه ملګرو ملتونو او نورو نړيولو سازمانونو ته ناسم معلومات ورکول او له همدې امله افغانستان ته د نوموړي پر راتګ بنديز لګول شوی.
د مجاهد په خبره، بېنېټ نړیوالو ته د افغانستان ناسم او له حقایقو لرې تصویر وړاندې کاوه او د دې تر څنګ يې د افغانستان حکومت پر ضد تبلیغات هم کول.
مجاهد زیاته کړې: « د ښاغلي بېنېټ په اړه باید ووایم، چې افغانستان ته د هغه پر راتګ بندیز لګول شوی؛ ځکه د افغانستان په اړه د پروپاګند لپاره ګومارل شوی و او داسې یو څوک نه دی، چې موږ یې پر خبرو باور وکړو. هغه به کوچنۍ موضوع لويوله او نورو سازمانونو ته یې هم ناسم معلومات ورکول.»
ریچارد بېنېټ د اسلامي امارت دې پرېکړې ته غبرګون ښودلی او وايي، خپلې دندې ته به ادامه ورکوي. نوموړي له اسلامي امارت غوښتنه کړې، چې پر خپله پرېکړه له سره غور وکړي او اجازه ورکړي چې افغانستان ته سفر وکړي.
د بېنېټ په خبره، له تېر یوه کال راهیسې یې افغانستان ته سفر نه دی کړی او که د سفر ممنوعیت یې ادامه ولري، دا به له سرپرست حکومت سره د نړیوالې ټولنې پر تعامل منفي اغېز وکړي.
د ملګرو ملتونو دغه ځانګړي راپور ورکوونکي په خپلو راپورونو کې په افغانستان کې د بشري حقونو او په تېره بيا د نجونو او مېرمنو د حقونو ناسم وضعیت په اړه ملګرو ملتونو ته مالومات وړاندې کول.
بېنېټ د افغانستان بشري حقونو په اړه په خپلو څو راپورونو کې سرپرست حکومت د ښځو او ټولو افغانانو له حقونو پر سرغړونه تورن کړی، خو سرپرست حکومت دغه تورونه تل رد کړي دي.
په ورته مهال د سیاسي چارو شنونکي د اسلامې امارت دا پریکړه د افغانستان پر زیان بولي او وايي، په اوسنیو شرایطو کې باید له نړیوالو سره دا ډول چلن ونه شي او په خبره يې نه باید د خبرو دریڅې د سرپرست حکومت پر وړاندې وتړل شي.
دوی زیاتوي، که چېرې د بېنېټ راپورونه له حقایقو لرې وي، ښه دا ده چې د ملګرو ملتونو پر راپورونو له سره غور وشي.
د سیاسي چارو شنونکی فېض محمد ځلاند وايي: « دغسې بنډیزونه د ډیپلوماسۍ پر ناکامۍ دلالت کوي، کله چې موږ د خبرو اترو دریڅې تړو، په لوی لاس خپلې ستونزې لا پسې ډېروو او یو بل لیدلوری ورته ټاکو، چې هغه د تخصام او تصادف لیدلوری دی.»
یو شمېر نور بیا پر ریچارډ بېنېټ د سفر بندیز ناسم کار بولي او وایي، افغانستان به نور هم انزوا ته کش کړي.
د سیاسي چارو کارپوه واحد فقیري وايي:« زه فکر کوم چې پر ریچارډ بېنېټ بندیز به د طالبانو او ملګرو ملتونو ترمنځ اړیکې نورې هم ترینګلې کړي. پر طالبانو به نیوکې نورې هم زیاتې او افغانستان لا پسې انزوا ته لاړ شي. زما په نظر دغه بندیز یو ناسم کار او خطا ده.»
د ملګرو ملتونو د بشري حقونو سترې شورا د کارپوهانو اعلامیې له مخې، چې د اګیست په ۱۴مه خپره شوې، سرپرست حکومت د خپلې درې کلنې واکمنۍ پر مهال د افغان مېرمنو او نجونو پر وړاندې د بنسټیز توپیر، جلا کولو او له خپلو حقونو څخه بې برخې کولو له چلن څخه کار اخیستی دی.
