د پاکستان بهرنیو چارو وزارت اعلان کړی چې حکومت یې له افغانستان سره د شارژدافیر له کچې سفير ته د ډېپلوماټیکو اړیکو لوړولو پرېکړه کړې.
د پاکستان لومړي وزیر مرستیال او بهرنیو چارو وزیر محمد اسحاق ډار پر خپلې اېکس پاڼې لیکلي، افغانستان ته یې له وروستي سفر وروسته د دواړو هېوادونو ترمنځ اړیکې ښه لور ته روانې دي او د کابل او اسلام اباد ترمنځ د سياسي اړیکو ښه والی به پر اقتصادي، امنیتي او سوداګریزو اړیکو د پام وړ اغېز ولري.
اسحاق ډار ویلي: « د ۲۰۲۵زېږدیز کال د اپریل پر ۱۹مه کابل ته له ګټور رسمي سفر وروسته د پاکستان او افغانستان ترمنځ اړیکې مثبت مسیر ته روانې دي. د دې حالت د دوام په موخه زه ډېر خوښ یم چې پاکستان پرېکړه کړې په کابل کې د خپل استازي موقف له شارژدافیر رسمي سفیر ته بدل کړي. زه باور لرم چې دغه ګام د دوو ملګرو هېوادونو ترمنځ د دوه اړخیز تعامل په لوړولو او د اقتصادي، امنیتي او سوداګریزو اړیکو په ژورتیا کې مرسته وکړي او د دواړو هېوادونو ترمنځ به راکړه ورکړه لاپسې پیاوړې کړي.»
د اسلامي امارت د بهرنیو چارو وزارت د پاکستان دغه پریکړه چې په کابل کې د خپل شارژدافیر کچه سفیر ته لوړي هرکلی کړی او زیاته کړې یې ده چې د افغانستان حکومت به په متقابله توګه په اسلام اباد کې د افغانستان سفارت د شارژدافیر کچه سفیر ته لوړه کړي.
کابل په دې باور دی چې د افغانستان او پاکستان ترمنځ د ډېپلوماټیکو اړیکو د کچې لوړوالی به د دواړو هېوادونو ترمنځ په بېلا بېلو برخو کې د همکاریو پراختیا ته لار هواره کړي.
د بهرنیو چارو وزارت مرستیال ویاند ضیاء احمد تکل وايي:« د افغانستان اسلامي امارت به هم په متقابل ډول په اسلام اباد کې د افغان سفارت د شارژدافير کچه د سفير سطحې ته لوړه کړي. د افغانستان او پاکستان ترمنځ د ډېپلوماټيکو اړيکو د کچې لوړوالی ګڼو برخو کې د دواړو هېوادونو ترمنځ د همکاريو پراختيا ته لار هواروي.»
د سیاسي چارو کارپوهان وايي، دا مهال افغانستان له هېوادونو سره د اړیکو ټینګښت او تعامل د پراختیا په حساسه مرحله کې دی او له پاکستان سره د ډېپلوماټیکو اړیکو د کچې لوړوالی باید همداسې په متقابل درناوي ولاړ او متوازن وي چې نورو هېوادونو سره اړیکو ټینګښت ته زیان ونه رسوي.
د سیاسي چارو شنونکی معین ګل څمکنی وايي: « پاکستان په تېره نیمه پېړۍ کې د افغانستان له ولس سره د خپلو ګټو په خاطر دوه ګونې پالیسي کړې، خو اوس ټول افغانستان دې ته متوجه دي چې پر پاکستان څومره باور کېږي. موږ باید پاکستان او هندوستان دواړه په یوه تله کې وساتو، ترڅو پاکستان ته بیا بهانه په لاس ور نه شي چې په افغانستان کې لاسوهنه وکړي. دا چې پاکستان خپلې ډېپلوماټیکې اړیکې د سفیر کچې ته لوړوي، دا یو ښه ګام دی؛ موږ له دوی سره په ډېرو برخو کې مشترکات لرو او همدې ته په کتو باید هوښیار اوسو او خپله پالیسي مناسبه عیاره کړو.»
د سیاسي چارو شنونکی شهزاده مسعود وايي: « که تېرو دوو لسیزو ته وګورو، د افغانستان پخواني ولسمشر حامد کرزي ۲۰ سره اړیکې ولرو، خو له بده بخته هېڅ مثبته پایله یې ورنه کړه. زه تمه لرم چې پاکستان په خپلو پالیسیو کې اساسي تغییرات راولي او افغانستان ته د یوې متمدنې اړیکې لپاره لاس ورکړي. دا به د دواړو هېوادونو پر ګټه وي. همدارنګه افغانستان ته په کار ده چې د سیمې او نړۍ له هېوادونو سره یوه متوازنه پالیسي ولري.»
په ورته مهال چین له افغانستان سره د ډېپلوماټیکو اړیکو د لوړوالي لپاره د پاکستان اقدام ستایلی او زیاته کړې یې ده چې دا به د دواړو هېوادونو ترمنځ د اړیکو لا ښه کېدو، د باور زیاتوالي او د همکاریو د پیاوړتیا لامل شي.
اوس مهال افغانستان په اسلام اباد کې او پاکستان په کابل کې فعال سفارتونه لري چې چارې یې د شارژدافیرانو له لوري سمبالیږي.
