د پاکستان بهرنیو چارو وزیر اسحاق ډار امریکا ته په رسمي سفر تللی او هلته یې له خپل سیال مارکو روبیو سره لیدلي.
په دې اړه خپره شوې اعلامیه کې راغلي چې نوموړي د نورو دوه اړخیزو مسایلو ترڅنګ د افغانستان پر موضوع هم بحث کړی.
اعلامیه کاږي چې اسحاق ډار د وسله والو ډلو له لوري د دې هېواد پر ضد د افغان خاورې د کارېدنې په اړه خپله اندېښنه شریکه کړې او له مقابل لوري یې له امنیتي ګواښونو سره د مبارزې په موخه د ترهګرۍ ضد همکارۍ د پیاوړتیا غوښتنه کړې.
د اعلامیې یوه برخه:« د پاکستان بهرنیو چارو وزیر د وسلهوالو ډلو له لوري د پاکستان پر ضد د افغان خاورې د کارېدنې په تړاو خپلې اندېښنې شریکې کړې او امنیتي ګواښونو سره د مبارزې په موخه یې د ترهګرۍ ضد همکاریو پر زیاتوالي ټینګار وکړ.»
پاکستان تر دې وړاندې هم په ځلونو پر افغان لوري دغه تور پورې کړی، خو د خپلو ادعاوو اثبات لپاره یې نړۍ او اوسني حکومت سره شواهد نه دي شریک کړي.
دغه هېواد ادعا لري چې ګواکې د پاکستاني طالبانو تحریک (ټيټيپي) چې له کلونو راهیسې د پاکستاني حکومت پر ضد وسله واله مبارزه کوي؛ د ډیورنډ فرضي کرښې دا غاړه پټنځایونه لري او پورې غاړه ته پوځي اهداف په نښه کوي.
د سیاسي چارو شنونکی شېر حسن حسن وايي:« اصلي خبره دا ده چې هلته د ټيټيپي ترمنځ په لسګونه نور توروریستي ګروپونه شتون لري او هغه د پاکستان په هره سیاسي فضا کې روزل شوې او رامنځته شوې دي، انکشاف یې کړی او په تېرو ۵۰ کلونو کې یې د افغانستان د ورانولو لپاره او په سیمه کې د خپل اقتدار د تامین لپاره دوی روزلي وو، پيدا کړې یې وو او اوس پاکستان ته خپله بلا ګرځېدلي.»
اسلامي امارت تازه په دې اړه څه نه دي ویلي، خو تر دې وړاندې یې دغه تورونه هر ځل رد کړي او هلته روانه ناامني یې د پاکستان کورنۍ مساله او د خپل امنیت په ټینګښت کې پاتې راتلل بللي.
د سیاسي چارو شنونکي وايي، پاکستان پخپله له څو لسیزو راهیسې په سیمه کې د نورو هېوادونو او استخباراتي ادارو پروژې پلي کوي او د هغوی ترسیم شوې اجنډاوې مخته وړي.
دا داسې مهال ده چې د پاکستان دفاع وزیر خواجه اصف او د پخواني بهرنیو چارو وزیر بلاول بوټو زرداري په شمول د دې هېواد ګڼو پخوانیو او اوسنیو چارواکو په رسمي بیاناتو کې په افغانستان کې خپلې لاسوهنې تایید کړي.
