له تېرو څه باندې څلورو کلونو راهیسې د ډېورنډ فرضي کرښې په اوږدو کې روانو جګړو، د پاکستان پر وړاندې د افغان خاورې کارېدو په تړاو د پاکستاني چارواکو ادعاوې او د پاکستان له اړخه د افغان کډوالو د جبري اخراج مسایل هغه څه دي چې د دواړو هېوادونو ترمنځ پر اړیکو منفي سیوری غوړولی.
تازه د پاکستان لومړي وزیر مرستیال او د بهرنیو چارو وزیر الجزیرې سره مرکه کې ویلي، هېواد یې له افغانستان سره ښې اړېکې لري او له تېرو څلورو کلونو راهیسې ورسره په سیاسي تعامل کې پاتې شوی دی.
د پاکستان د بهرنیو چارو وزیر اسحاق ډار ویلي: «له افغانستان سره مو دوه اړخیزې اړیکې مخ په وده روانې دي او ورځ تر بلې لا ښې کېږي. موږ له افغانستان سره په تېرو څلورو کلونو کې ښه تعامل کې پاتې شوي یو. له هغوی سره مو په بېلابېلو برخو لکه سوداګرۍ، اقتصاد، کډوالو او پر نور ګڼو مسایلو خبرې او راکړه ورکړه کړې ده. افغانستان زموږ ګاونډی هېواد دی او که دوی هغه ډلې چې د پاکستان ناامنۍ کې ښکېلې دي را کابو کړي، دا اړیکې لا ښې کیږي.»
دې ته په پام، د نړیوالو اړیکو کارپوهان وایي، پاکستان دې د بې ځایه څرګندونو پر ځای له افغان لوري سره مخامخ خبرې وکړي او د خپلو داخلي ستونزو لپاره دې په خپله حللاره پیدا کړي.
د نړیوالو اړیکو کارپوه نجیب الرحمن شمال وايي: « نباید له یاده وباسو چې پاکستان له بده مرغه هېڅکله د افغانستان په تړاو په خپلو ژمنو نه دی درېدلی او هرکله د بېلابېلو بهانو په جوړولو سره د دواړو هېوادونو د دوستانه اړیکو خرابولو سبب شوی. زه امید لرم تېرو تجربو ته په کتو، له افغانستان سره د اړیکو په تړاو له صداقت څخه کار واخلي.»
اسلامي امارت د اسحاق ډار د تازه څرګندونو او تورونو په تړاو څه نه دي ویلي، خو له دې وړاندې یې په وار وار ټینګار کړی چې اسلامي امارت د خپلې اقتصاد محوره پالیسۍ پر بنسټ د پاکستان په ګډون له ټولو هېوادونو سره ښې اړیکې غواړي.
د سیاسي چارو کارپوهان وایي، پاکستان دې د ښه ګاونډیتوب د اثبات لپاره د سوداګرۍ په برخه کې ستونزې نه جوړوي او د مشکلاتو پر ځای دې افغان سوداګرو ته اسانتیاوې برابرې کړي.
د چارو شنونکی ادریس محمدي ځاځی وايي: « دا مسایل د پاکستان خپل کورني یا داخلي مشکلات دي، نو د دې لپاره باید پاکستان د ټي.ټي.پي مهارولو یا له هغو سره د خبرو په موخه، په کور دننه سنجش وکړي او پالیسي ورته جوړې کړي، ترڅو هغه ګواښونه حل او فصل کړي چې اوس پاکستان ورسره مخ دی.»
له دې سره په یوه وخت، پاکستاني رسنیو خبر ورکړی چې اسلام اباد کې د افغانستان سفیر د دې هېواد د بهرنیو چارو وزارت ورغوښتی او د وسله والو د فعالیتونو په اړه یې اندېښنې ورسره شریکې کړې دي.
د اسلامي امارت ویاندیانو د سردار احمدشکېب د احضار په تړاو بې خبري وښوده، خو تر دې مخکې د ملي فاع وزیر ملا محمد یعقوب مجاهد د پاکستان امنیتي ادارې ننګولې وې چې د خپل هېواد امنیتي ستونزو کې افغانستان دخیلوي او دا د دوی ښکاره کمزورتیا ده.
