د اسلامي همکاریو سازمان د غړو هېوادونو د بهرنیوچارو وزیرانو همغږۍ په ناسته کې د افغانستان پر ثبات، هوساینې او له افغانستان سره د دغه سازمان پر لا همغږۍ ټینګار شوی.
د پاکستان بهرنیو چارو وزیر محمد اسحاق ډار دغې ناسته کې د وینا پرمهال د پاکستان د سولهییز، باثباته او هوسا افغانستان لپاره له هرې هڅې ملاتړ په ډاګه کړی او زياته کړې يې ده چې د ترهګرۍ په اړه د اسلاماباد اندېښنو په پام کې نيولو سره دې کابل د يادې پديدې پر وړاندې کوټلي اقدامات وکړي.
هغه زیاته کړې:« پاکستان د سولهییز، باثباته او هوسا افغانستان لپاره د هرې هڅې ملاتړ کوي، خو افغانستان اوس هم د پاکستان لپاره د اندیښنې ډک ټکی دی او له افغان لوري غواړو، چې د ترهګرۍ پر وړاندې مبارزه وکړي.»
په همدې حال کې کابل بیا دغه ډول اندیښنې او ادعاوې چې ګني له افغانستانه به نورو هېوادونو ته ګواښ پېښ شي، په کلکه ردوي او زیاتوي چې په افغانستان کې هېڅ وسلهواله ډله حضور نه لري.
د اسلامي امارت مرستیال ویاند حمد الله فطرت وايي:« له افغانستانه نورو هېوادونو د ګواښ پېښدو په اړه ناسمې اندېښنې او په دې اړه شوې ادعاوې په کلکه ردوو. موږ یو ځل بیا په ډاګه وایو چې په افغانستان وسله والې ډلې فعالیت نه لري او هیچاته اجازه نه ورکوو چې زموږ خاوره د بل هېواد پر وړاندې وکاروي.»
د سیاسي چارو شنونکي بیا په دې باور دي چې پاکستان لاهم د افغانستان پر وړاندې خپل دریځ ته بدلون نه دی ورکړی، ډېپلوماتان یې په نړیوالو سټیجونو کې د افغانستان په تړاو دوه مخې ډېپلوماسي مخ ته وړي او موخه یې هم نړۍ ته د افغانستان ناسم تصویر وړاندې کول دي.
دوی زیاتوي پاکستان له یوه لوري له افغانستان سره د اړیکو د ښه کېدو د هڅو خبره کوي، خو له بل خوا ناسم تورونه پورې کوي چې دا کار د کابل پر وړاندې د اسلام اباد دوه مخي سیاست ښکارندوي کوي.
د پوهنتون استاد فیض محمد ځلاند وايي:« پاکستان تل د افغانستان په اړه دوه رنګه منافقانه سیاست غوره کړی. پاکستان په ټولو نړیوالو ستېجونو کې، د پاکستان لومړي وزیر، بهرنیو چارو وزیر او ګڼو ډېپلوماټانو په ملګرو ملتونو کې، د سیمې په جوړښتونو کې، د شانګهای په تړون کې د افغانستان امنیت او ثبات په اړه دوه رنګه نظریات خپاره کړل، ترڅو سیمه او نړۍ د افغانستان له اوسني وضعیته ووېروي. دا په خپله د دوی د خصمانه ډېپلوماسۍ یو اړخ دی. هم مهاله دوی د ګډې همکارۍ، د ګاونډیټوب او د اسلامي ورورولۍ غږ پورته کوي، حال دا چې په دغو ټولو مسایلو دوی خپله باور نه لري.»
په ټوله کې باور دا دی چې پاکستان غواړي یو ځل بیا نړۍ ته افغانستان ناامنه معرفي کړي، خو اوس نړیوال په دې پوهیږي چې د ترهګرو مرکزونه او پټنځایونه په کوم هېواد کې دي.
له دې سره د اسلامي همکاریو سازمان د غړو هېوادونو د بهرنیوچارو وزیرانو د همغږۍ په ناسته کې ترکیې بیا د او.آ.سي او افغانستان ترمنځ د همغږۍ پر لا زیاتوالي ټینګار کړی دی او دغه کار یې مهم بللی دی.
