د پاکستان لومړي وزیر مرستیال او بهرنیو چارو وزیر اسحاق ډار وایي، د ملګرو ملتونو په امنيت شورا کې د هېواد اړوند مسايلو ترڅنګ د افغانستان په اړه یې ځينې مسايل هم بيان کړي.
نوموړي سولهییز او باثباته افغانستان د سیمې او نړۍ د امنیت ټينګښت لپاره مهم ياد کړی او زياته کړې يې ده، چې پاکستان به دې هدف ته د رسېدو لپاره د افغانستان له سرپرست حکومت سره تعامل ته دوام ورکړي.
اسحاق ډار د نړيوالو له لوري د هغو مرستو ملاتړ هم کړی چې په افغانستان کې اړمنو کورنيو ته رسول کېږي.
هغه په دې اړه ویلي:« یو سولهییز، باثباته، متحد او سوکاله افغانستان د پاکستان لپاره حیاتي اهمیت لري. په ټوله نړۍ کې داسې دوه هېوادونه نه شته، چې دومره ګډ ارزښتونه دې ولري لکه پاکستان او افغانستان. له تاریخ او جغرافیې نیولې تر عقیدې او کلتور، ژبې او ادبیاتو، خوړو او موسیقۍ پورې. له هغه وخت راهیسې چې طالبان د ۲۰۲۱ کال د اګست په میاشت کې واک ته ورسېدل، پاکستان یو واقعيبینانه دریځ غوره کړی، چې تمرکز یې په عملي همکاریو دی، څو په افغانستان کې د هر ډول بشري بحران مخه ونیسي او د ۴۰ میلیونو افغانانو د هوساینې لپاره اسانتیاوې برابرې کړي.»
د سیاسي چارو کارپوهان بیا د پاکستان ورته دريځ ته د شک په سترګه ګوري؛ ځکه په خبره يې پاکستان د ورته سټېجونو له لارې تل د افغانستان ناامنه ښودلو هڅه کړې.
د سیاسي چارو شنونکی ادریس محمدي ځاځی وايي:« زموږ غوښتنه دا ده چې خپله پاکستان په لومړي قدم کې پر خپلو خبرو باندې صادق پاتې شي. افغانستان ته دې سیاسي او اقتصادي ستونزې نه جوړوي او پاکستان دې په نړیوالو ستېجونو کې د افغانستان د خلکو استازولي نه کوي.»
سرپرست حکومت په دې اړه څه نه وایې، خو له دې مخکې يې ویلي و، چې د پاکستان په شمول له ټولو هېوادونو سره د مثتبو اړيکو غوښتونکی دی.
د نړیوالو اړیکو کارپوهان وایي، پاکستان له تېرو څلورو لسېزو راهیسې په افغانستان کې له یوه قوي او مرکزي حکومت وېره درلودلې او ټینګار کوي، چې سرپرست حکومت دې د پاکستان پر وړاندې له محتاط سیاست کار واخلي څو افغانستان بیا د نیابتي جګړو ډګر نه شي.
د سې شبنې پر ورځ هم د پاکستان د لومړي وزیر مرستیال او بهرنیو چارو وزیر اسحاق ډار د افغانستان سرپرست حکومت او د نړۍوالې ټولنې ترمنځ د تعامل تعریف په موخه د یوې پراخې او جامع کړنلارې پر جوړېدو ټینګار کړی و.
