د بې پولې خبریالانو سازمان یا ار ایس ایف د جرمونو له نړیوالې محکمې هاګ غوښتي،چې افغانستان کې د خبریالانو او رسنیو کارکوونکو د وژنې قضیې وڅېړي.
د بې پولو خبریالانو سازمان ویلي، دغې محکمې ته یې پرون شکایت کړی،چې په تېر یوه کال کې د افغان خبریالانو او د رسنیو کارکوونکو پر وړاندې د شویو جنایتونو په اړه خپلې څېړنې او پلټنې پیل کړي.
د ار اس اف په بیان کې راغلي چې په دې موده کې ۱۱ خبریالان په افغانستان کې وژل شوي او د بې پولې راپور ورکوونکو سازمان د دغو کسانو دوسیې د څېړنو لپاره نړیوالې جنايي محکمې ته سپارلي دي.
د بې پولې راپور ورکوونکو سازمان د ملوماتو پر اساس په تېرو دوو لسیزو کې په افغانستان کې لږ تر لږه ۱۰۰ خبریالان د دندې پر مهال وژل شوي دي،چې ۱۶ یې بهرنیان وو.
همدا شان په دې موده کې له ۶۰ پر زیاتو رسنیو بریدونه شوي او تخریب شوي دي .
دغه راز د خبریالانو د ګواښلو سلګونه قضیې هم ثبت شوي دي.
