ارګ وایي، د سولې اصلي ادرس افغان حکومت او خلک دي او د مسکو ناسته چې د طالبانو سیاسي ماته یادیږي بې پایلې یادوي.
امریکا سره د سولې له ځنډېدلو خبرو یوه اونۍ ورسته د طالبانو مرکچي پلاوی د خبرو اترو لپاره مسکو ته رسېدلی، هغه هېواد چې دوه ځلې یې د طالبانو د ناستو کوربه توب کړی دی.
عباس ستانکزي روسي رسنیو سره په مرکه کې ویلي، طالبان اوس هم د سولې خبرو ته تیار دي، خو که امریکا په جګړې ټینګار کوي طالبان سل کاله هم نوره جګړه کولای شي.
د طالبانو د مرکچي پلاوي مشر عباس ستانکزي داسې ویلي )) طالبان اوس هم د سولې خبرو ته لېواله دي، خو که امریکا جنګ ته دوام ورکول غواړي نو طالبان سل کاله نور هم جګړه کولای شي. امریکایان په خپله اعتراف کوي چې په تېرو اونیو کې یې ګڼ شمېر طالبان وژلي، خو بل لور ته د یوه امریکایي عسکر د وژل کېدو په پلمه د سولې خبرې دروي.که امریکایان ګڼ شمېر طالبان وژلی شي نو بیا طالبان هم حق لري چې له دوی نه یو دوه کسان ووژني.((
خو د ولسمشر ویاند صدیق صدیقي وایي، د ټاکنو لپاره یې د سولې اړوند کارونه درولي او مسکو ته د طالبانو رجوع یوه سیاسي ماته ده چې دا ډول ناستې د سولې برخه کې کومه پایله نه لري.
طالبانو له امریکا سره د سولې خبرو د پیل وړاندې د سیمې په هېوادونو ګرځېدلي دي ترڅو سیمه ییز او نړیوال ملاتړ ترلاسه کړي چې افغان حکومت یې هم په لټه کې و.
د خلاصون لارې شورا مشر سید اکبر اغا وايي، مسکو ته د طالبانو تازه سفر په دې مانا هم بلل کېږي چې طالبان غواړي وښي د سولې خبرو کې ملامت امریکایان دي نه طالبان.
مسکو ته د طالبانو د سفر په اړه داسې تحلیل کېږي چې طالبان غواړي په امریکا د هغو هېوادونو له لارې فشار راولي چې په سیمه او افغانستان کې په سیاسي او نظامي پلوه ښکیل دي.
اوس چې طالبانو مسکو ته سفر کړی ویل کېږي د امریکا یو پلاوی به په دې ورځو کې اسلام اباد ته سفر وکړي.
اوس به ولیدل شي چې د طالبانو او امریکا ترمنځ درېدلې خبرې د کوم میکانیزم پراساس پیلږي.
