ګڼو افغانانو په بریټانیا کې د پاکستان سفارت مخې ته پر افغانستان د د دې هېواد بريدونو پر ضد لاریون وکړ او پر افغانستان یې د پاکستان یرغل او په کې د ملکي وګړو مرګ ژوبله، جنایت وباله.
له بریټانیا سربېره په فرانسه کې هم افغانان پر افغانستان د پاکستان بريدونو خلاف غږ پورته او د پاکستان ضد شعارونو د ورکولو ترڅنګ یې وویل چې پاکستان په خپل ګاونډ کې پر ځان بسيا افغانستان نه شي زغملی او د کمزوري ساتلو لپاره يې دسيسې جوړوي.
یو تن لاریون کوونکی وايي: « د پاکستان ترهګر پوځ او استخبارات چې افغانستان یې په تېر پنځو لسیزو کې په اور سوځولی او د افغانانو وینې یې بهولې دي، اوس هم د افغانستان پرمختګ او د افغانانو یوالی نه شي زغملی او د خپل کور اختلافونه او اقتصادي ستونزې پر افغانانو ور اچوي.»
اروپا مېشتو لاریون کوونکو د پاکستان پر غندنو سربېره له نړيوالې ټولنې وغوښتل چې پر بې ګناه افغانانو د پاکستان بريدونو د مخنيوي له لارې د سيمهييز ثبات له تحکيم سره مرسته وکړي.
یو تن لاریون کوونکی وايي: « د خپل کور او خاورې دفاع به هر ځای او په مېړانه کوو. دغه دفاع که په هره بیه او هر ډول قربانۍ وي. د پاکستان پوځي رژیم په دې وروستیو کې د افغانستان پر خاوره تېری او ړندې بمبارۍ کوي او په پایله کې یې زموږ عام وګړي شهیدان کړي. زموږ له نړیوالې ټولنې، ملګرو ملتونو، د بریټانیا له حکومت او پارلمان غوښتنه کوو چې د پاکستان د دې جنایتونو او بریدونو مخنیوی وکړي.»
همدارنګه په ناروې هېواد کې هم د پاکستان بريدونو خلاف ورته لاريون وشو او پرېکړهليک يې چې په کې د يادو بريدونو د مخنيوي غوښتنه او د پاکستان له لوري د ترسره شویو جنایتونو يادونه شوې، ملګرو ملتونو او د جرمون نړيووالې محکمې ته وسپاره.
شنونکي هم په ملي مسايلو کې په کوردننه او بهر د افغانانو ګډ دريځ ستايي او له همدې امله په اروپا کې د پاکستان بريدونو پر ضد د معترضو افغانانو غږ بدرګه کوي.
د سیاسي چارو شنونکی خليل احمد نادم وايي: « دا چې افغانان اوس په نوره نړۍ کې د پاکستان د تېري خلاف غږ پورته کوي، دا د افغانانو یوالی څرګندوي او د افغانستان په ګټه کار دی. له دې سره به د افغانانو غږ تر نړیوالو ورسېږي او د پاکستان له جنایتونو به پرده پورته شي. پاکستان مداخله کوي، ملکي وګړي وژني او ملکي تاسیسات په نښه کوي. ملګرو ملتونو اوس خپل ماهیت له لاسه ورکړی او د اعلامیو له خپرولو پرته بل څه کولی نه شي.»
له دې وړاندې په جرمنې، بلجيم او ځينو نورو هېوادونو کې پر افغانستان د پاکستان يرغل خلاف اعتراضونه وشول. له دې سره، د پاکستان پوځي رژيم د يکشنبې په ورځ د کونړ په ناړۍ ولسوالۍ او اسعداباد ښار د هوانونو په وېشتلو سره د ملکي وګړو کورونه او ښوونځي په نښه کړل.
په دې بريدونو کې يو ملکي وګړی شهيد او ۱۷ نور ټپيان شول.
