Skip to content
د جي ۲۰ یا د نړۍ د لومړي صنعت لرونکو هېوادونو ناسته کې،چې ډېر بحثونه په کې د نړۍ پر فقر، بې وزلۍ او اقلیمي بدلونونو وشو، د افغانستان او نورو بې وزله هېوادونو په تړاو په کې ځانګړې خبرې نه دې شوي.
اروپایي کمېسیون،چې د جي۲۰ ناستې یوه برخه دی، د ناستې له پیل وړاندې یې د افغانستان په ګډون د ځینو شاته پاتې هېوادونو پر بشري وضعیت اندېښنه ښودلې.
د یاد کمېسیون له لوري په خپره شوې خبرپاڼه کې ویل شوي،چې د افغانستان په ګډون د نړۍ د ۱۵هېوادونو وګړي له سختې لوږې سره مخ دي او د بشري مرستو د یوې کڅوړې اعلان یې هم کړی،چې د سیمه ییز کړکېچ او فقر په لمنځه وړلو کې به د پام وړ مرسته وکړي.
د خبرپاڼې یوه برخه:«اروپایي کمېسیون له هغو ملتونو سره د ملاتړ لپاره یو بل ګام اخلي،چې په نړیواله کچه دې وروستیو کې د خوراکي توکو له کمښت سره مخ دي. زموږ د بشري مرستو د ۲۱۰ میلیونه یورو نوې کڅوړه به هغو ۱۵ هېوادونو ته ورکړل شي،چې ډېره اړتیا ورته لري. افغانستان، نایجریا، سومالیا، سویلي سوډان او ایتوپیا هغه هېوادونه دي،چې د قحطۍ له یوه ستر ګواښ سره مخ دي.»
خبرپاڼه کې ویل شوي،چې شااوخوا ۲۴ میلیونه افغانان بېړنیو مرستو او ژمنیو توکو ته اړتیا لري او د ۲۱۰ میلیونه یورو مرستې څخه یې ۷۵ میلیونه یورو افغانستان کې د سیمه ییز کړکیچ او د بې وزلۍ د لهمنځه وړلو لپاره ځانګړې کړې دي.
د خبرپاڼې یوه برخه:« له اعلان شوې کڅوړې ۷۵ میلیونه یورو افغانستان ته ځانګړي شوي،چې په دې سره به دغه هېواد کې سیمه ییز کړکېچ او د خواراکي توکو د خوندیتوب وضعیت ته رسېدنه وشي. د اټکل له مخې، نږدې ۲۴ میلیونه افغانان،چې ډېری د وروستیو طبعیي پیښو له خوا اغیزمن شوي، بشري مرستو او ژمنیو توکو ته زیاته اړتیا لري.»
له تیرو ۱۵ میاشتو راهیسې ګڼو بهرنیو هېوادونو له افغانستان سره د بې وزلۍ له منځه وړلو په موخه په میلیونونه ډالر او یورو بشرې مرستې وکړې،خو د تیر پرتله یې په اړه اندېښنې ورځ بلې ډیريږي او د فقر کچه کې کموالی نه دی راغلی.
دا چې د بهرنیانو مرستې به تر کومه داسې دوام وکړي، څرګنده نه ده،خو ښايي، دایمي نه وي، نو که یادې مرستې د ورځني ژوند د ستونزو د رفع کولو پر ځای پر اساسي او لویو پروژو مصرف شي او پانګونه پرې وشي،نو ګڼې اقتصادي ستونزې به پرې حل شي.
