د آستانه ټايمز ورځپاڼې د راپور له مخې، د اروپايي ټولنې او منځنۍ آسيا هېوادونو استازي د تاجیکستان په پلازمېنه دوشنبې کې د شپږمې ګډې ناستې په لړ کې سره جرګه شوي او د خپلو شريکو مسايلو ترڅنګ یې د افغانستان پر وضعیت هم هر اړخيز بحث کړی.
راپور کې ویل شوې، دوی د افغانستان اقتصادي وضعيت بحراني ياد کړی او له همدې کبله يې پر ياد وضعيت اندېښنه ښودلې. د اروپايي ټولنې او منځنۍ آسيا هېوادونو استازو ويلي، اکثريت افغانان له لوږې سره مخ دي او نړيوالو بشري مرستو ته اړتیا لري.
د راپور له مخې، يادو استازو وړانديز کړی چې د افغانستان اقتصادي وضعيت ښه کولو لپاره اړتيا ده چې د دې هېوادونو له لوري له کابل سره سوداګريزه همکاري زياته شي.
د تاجېکستان د بهرنيو چارو وزارت ویلي: « د ناستې ګډونوالو د ۲۰۲۴ زېږدیز کال په فيبرورۍ کې له ترسره شوې ناستې راهيسې په افغانستان کې د ټولنيزو اقتصاد او سياسي پرمختګونو او همدارنګه له افغانستان سره د مرستې لپاره د منځنۍ آسیا هېوادونو او اروپايي ټولنې د تګلارو په اړه نظرونه تبادله کړل.»
د نړیوالو اړیکو شنونکي هم له افغانستان سره د هېوادونو سوداګريزې همکارۍ او بشري مرستې مهمې بولي او زياتوي،د يادو همکاريو د دوام په صورت کې اقتصادي وده يقيني کېدای شي.
دوی له سرپرست حکومته هم غواړي چې د عامو افغانانو د ستونزو حل لپاره دې د نړيوالې ټولنې باور ترلاسه کړي.
د نړيوالو اړيکو شنونکی نجيب الرحمان شمال وايي: « له افغانستان سره د همکارۍ پر لارو یې ټینګار کړی. زه هیله لرم دغه هېوادونه له افغانستان سره د همکارۍ په برخه کې له اقتصادي پلوه مرسته وکړي؛ ځکه چې اقتصادي همکارۍ او بشردوستانه مرستې پر رسمیت پېژندلو پورې هېڅ تړاو نه لري، خو کولی شي د افغانستان د اقتصادي ودې او دغه راز د افغانستان له خلکو سره د مرستې په موخه ګټه ورسوي. زه تمه لرم چې د سرپرست حکومت چارواکي د نړیوالې ټولنې د باور جلبولو او ترمنځ شته ستونزو د هواري لپاره زمینه برابره کړي.»
د اقتصادي چارو شنونکي بیا د افغانستان وضعيت او په ځانګړې توګه اقتصادي وضعيت په تړاو د هېوادونو له لوري بحثونه ګټور ګڼي او زياتوي، د يادو بحثونو په پایله کې له افغانستان سره په سوداګريزه برخه کې کېدونکې همکارۍ مشترکات زياتولی شي.
د اقتصادي چارو شنونکی عبدالنصير رشتيا وايي: « زه فکر کوم، هر څومره ډېر چې افغانستان د نړۍ او سیمې هېوادونو د خبرو په محراق کې ځای ولري، دا د افغانستان پر ګټه ده او په ټولیزه توګه کولی شي د غوره ستراتیژیکو اقتصادي او سیاسي اړیکو سبب شي. نو، هرڅومره ډېر چې موږ د سیمې او ګاونډ له هېوادونو سره راکړه ورکړه ولرو، هم د لګښتونو له پلوه ارزانه تمامېږي او هم د صادراتو او وارداتو په چټکتیا کې مرسته کولی شي.»
د افغانستان اقتصادي وضعيت په تړاو د اروپايي ټولنې او منځنۍ آسيا هېوادونو اندېښنې داسې مهال دي چې د ملګرو ملتونو د راپورونو پر بنسټ دا مهال شاوخوا ۲۴ ميليونه افغانان له لوږې سره د مخ کېدو له امله بشري مرستو ته اړتيا لري.
