د اروپايي ټولنې غړيو هېوادونو استازي او د منځنۍ آسيا هېوادونو مشران د ازبېکستان په ثمرقند کې د خپلمنځي مسايلو ترڅنګ د افغانستان پر اړوند مسايلو هم غږېدلي.
د دې سرمشريزې په اعلاميه کې يادو هېوادونو په افغانستان کې پر روان بشري وضعيت اندېښنه ښودلې او غوښتنه يې کړې چې په افغانستان کې دې داسې ټولګډونه حکومت رامنځته شي چې د لږکيو په شمول د ټولو خلکو بشري حقونه تامين کړي.
د اعلاميې له مخې، له ټولو اقشارو تشکيل شوی حکومت د اعلاميې په ټکو په افغانستان کې د ټولو ناخوالو د حل يوازېنۍ لار ده.
د اروپايي ټولنې او منځنۍآسيا هېوادونو د ګډې اعلاميې یوه برخه:« موږ پر تېرو ژمنو ټینګار وکړ چې افغانستان یو امن، باثباته او د ټول شموله حکومت درلودونکی واوسي، ترڅو بشري حقونه په کې خوندي او ټولو وګړو ته يې په بشړ احترام قایل وي.»
دوی همداراز د ښځو او نجونو لپاره د زده کړو او په عامه ژوند کې يې ګډون ته د برابر لاسرسي غوښتنه هم کړې او یو ځل بیا يې نجونو ته د زده کړو او ښځو ته د کار کولو اجازې پر ورکړې سربېره د ټولو وګړو د آزادۍ پر خونديتوب هم ټينګار کړی.
د گډې اعلامیې یوه برخه:« موږ د افغانستان د خلکو ملاتړ ته دوام ورکوو. موږ په افغانستان کې له نړیوالو معیارونو سره سم زده کړو ته د بشپړ او مساوی لاسرسی او په عامه ژوند کې د ښځو او نجونو د ګډون غوښتنه کوو.»
په ورته مهال د سیاسي چارو شنونکي د هېوادونو ورته غوښتنې پر ځای بولي او وايي، که سرپرست حکومت د ولس او نړیوالو مشروع غوښتنې ومني، پر رسمیت به هم وپېژندل شي.
د سیاسي چارو شنونکی اخترمحمد راسخ وايي: « کوم وړاندیز چې د ښې حکومتوالۍ په اړه د اروپايي ټولنې له خوا طالبانو ته شوی، که چېرې واقعا ً طالبان دا وړاندیز ومني، دا د افغانانو په خیر دی، د طالبانو د حکومت په خیر دی او د نړۍ د هغو هېوادونو په خیر هم دی چې غواړي د افغانستان له ولس سره همکاري وکړي او دا هېواد له سیاسي انزوا ووځي.»
ځينې نور بیا د ټوله شموله حکومت موضوع د افغانستان کورنۍ مساله بولي او له سرپرست حکومت غوښتنه کوي چې په دولتې ادارو کې دې مسلکې کسانو ته ځای ورکړي، ترڅو د ولس باور تر لاسه کړي.
د سیاسي چارو شنونکی فیض محمد ځلاند وايي: « د نړیوالو دا غوښتنه چې افغان حکومت باید ټولشموله شي، ماته ښکاري دا تر ډېره د افغانستان په خپلو کورنیو مسایلو پورې اړه لري. اسلامي امارت باید د سرپرست حکومت د دایمي کولو لپاره حتمي ده چې باید یوه ملي اجماع راوغواړي او یوه قانونمنده اداره رامنځته کړي. د دې کار یوه ګټه به دا وي چې د ولس باور او ملي مشروعیت به ډېر شي، ولس به ځان په حکومت کې وګوري او حکومت به تر ډېره د مسلکي کسانو لاس ته ورشي.»
د سرپرست حکومت چارواکو د اروپايي ټولنې او منځنۍ آسيا هېوادونو د تازه غوښتنو په اړه څه نه دي ویلي، خو له دې وړاندې يې د ټولشموله حکومت رامنځته کول، د نجونو زده کړې او ښځو ته د کار اجازې ورکړه کورنۍ مساله بللې وه.
