په دې وروستیو کې د سیمې هېوادونو او نړیوالو بنسټونو له خوا په جوړېدنکو ناستو کې د خبرو اجنډا یوه برخه افغانستان هم وي.
تازه د ترکمنستان بیزنېس وېب پاڼې د دې هېواد د بهرنیو چارو وزارت له قوله لیکلي، د ترکمنستان بهرنیو چارو وزارت مرستیال احمد ګوربانوف د اروپايي ټولنې له استازو سره د ترکمنستان – اروپايي ټولنې د بشري حقونو ۱۷ ام ډیالوګ په څنډه کې کتلي او د افغانستان وضعیت په رڼا کې يې د سیمې پر امنیتي مسایلو خبرې کړې.
ترکمنستان بیزنېس وېب پاڼې د راپور یوه برخه: « دواړو خواوو د افغانستان د وضعیت په رڼا کې د سیمې د امنیت پر مسایلو خبرې کړې دي. د ترکمنستان لوري یو ځل بیا خپل بې طرفانه دریځ چې د ښه ګاونډیتوب او د نورو هېوادونو په کورنیو چارو کې د نه مداخلې پر اصولو ولاړ دی، ټينګار کړی.»
په راپور کې دغه راز راغلي، ترکمنستان د افغانستان سولې او ټیکاو په تړاو خپلو هڅو ته د دوام ورکولو ډاډ ورکړی.
د راپور یوه برخه:« د ترکمنستان د بهرنیو چارو مرستیال وزیر احمد ګوربانوف ویلي، ترکمنستان په افغانستان کې د سولې او دوامدار پرمختګ لپاره هڅې کوي. په دغو هڅو کې د بشري مرستو برابرول او د سولې د هڅو ملاتړ شامل دي. په ځانګړې توګه، هغو مهمو بنسټیزو پروژو ته پام وشو چې په کې د ترکمنستان – افغانستان د اورګاډي پټلۍ جوړول او د انرژۍ او ټرانسپورټ د نویو دهلېزونو پراختیا شامله ده.»
که څه هم سرپرست حکومت د دې لیدنې کتنې په تړاو څه نه وایي، خو له دې وړاندې یې د افغانستان پرمختګ په تړاو د سیمې هېوادونو مثبتې خبرې او هڅې ستایلې دي.
د سیاسي چارو شنونکي د افغانستان په تړاو د ترکمنستان پاليسي مثبته بولي او زیاتوي، دا ډول ليدنې او څرګندونې کولی شي د لا پرمختګ او ټیکاو فرصتونه رامنځته کړي.
د سیاسي چارو شنونکی عبدالصادق حمیدزوی وايي: « د افغانستان او ترکمنستان اړیکې داسې اړیکه بللی شو چې د ګټو، اقتصاد او لورېینې ډکه ده. ترکمنستان په نورو دریځونو کې هم د افغانستان ثبات لپاره غږ کوي او اخلاص لري، ځکه د دوی پالیسي اکثریت اقتصاد محوره ده.»
د سیاسي چارو شنونکی خلیل احمد نادم وايي: « ترکمنستان تل د افغانستان په اړه مثبت سیاست لري او بې طرفه دی. دوی همیشه غواړي چې افغانستان کې ثبات وي، ځکه دوی پوهېږي چې د افغانستان ثبات د سیمې او ترکمنستان پر ګټه دي. د همدې لپاره، ترکمنستان تل د افغانستان ملاتړ کوي او په نړیواله کچه هم مثبت نظر لري.»
دا په داسې حال کې ده چې د افغانستان او ترکمنستان ترمنځ اړیکې تر بل هر وخت ښې شوې او ټینګار پر دې کېږي چې دا اړیکې تر سفارتي کچې لوړې شي.
