په اروزګان ولایت کې دا مهال ۵ خصوصي راډيوګاني او يو خصوصي ټلويزیون چینل فعالیت کوي چې د مسوولينو په وينا يې د اقتصادي ستونزو له امله د تړل کېدو حالت ته نږدي شوي.
په دغه ولايت کې د خصوصي رسنيو استازي له نړيوالو موسیساتو او په ځانګړي ډول د ملګرو ملتونو تر چترلاندې د مرسته کوونکو سازمانونو څخه غوښتنه کوي چې مالي تمويل یې وکړي.
د رسنيو استازي وايي، تر نړيوالو موسیساتو یې د غږ رسولو په هدف د اقتصاد رياست مسوولينو سره هم خپلې ستونزې شریکې کړي دي.
اروزګان ولایت کې د یوې خصوصي رسنۍ مسوول خان محمد سیال وايي:« په دې وروستیو کې د هېواد په ټولو ولایتونو کې غږیزې او انځوریزې رسنۍ دواړه له اقتصادي ستونزو سره مخ دي. د هغو له جملې یو ارزګان ولایت دی، چې رسنۍ په کې ډېر بد وضعیت کې قرار لري او ان د تړلو له ګواښ سره مخ دي. هغه رسنۍ چې وړاندې به یې ۱۵ کارکوونکي لرل اوس دوه یا درې کارکوونکي لري.»
اروزګان کې د یوې خصوصي رسنۍ مسوول احسان الله ولسمل وايي:« که اعلانات رانه کړل شي نو موږ له ډېرو نورو ستونزمنو حالاتو سره مخ شو. نو هېله مو دا ده، چې رسنیو ته اعلانات ورکړل شي. تېره ورځ مو هم همدا غوښتنه وکړه، د اقتصاد له رئیس چې موسیسې وهڅوي ترڅو رسنیو ته اعلانات ورکړي، دا رسنۍ د ټول ولس رسنۍ دي. یوازې زموږ رسنۍ نه دي، موږ د ټول ولس لپاره فعالیت کوو، نو دوی باید له موږ سره په هره برخه کې ملاتړ وکړي.»
د دغو رسنيو ستازو په وينا چې اوس مهال له سخت اقتصادي بحران سره مخامخ دي او په وينا يې پر ټولو کارکوونکو يې د کار په بدل کې امتيازات بند کړي دي.
دوي وايي، که يې شته ستونزو ته پاملرنه ونه شي رسنۍ به يې سقوط شي.
په اروزګان کې ځايي مسولين هم د رسنیو مالکینو ستونزې مني او وايي، اقتصادي ستونزې به له موسیساتو سره شريکې کړي او غوښتنه به ترې وکړي چې د عامه پوهاوي ټول پرګرامونه د اعلاناتو په ډول خصوصي رسنيو ته ورکړي.
د یاد ولایت اطلاعاتو او کولتور مشر قاري اغاولي قریشي ژمنه کوي چې په رسنيو کې د اقتصادي ستونزو د له منځه وړلو لپاره به د اطلاعات او کلتور وزارت څخه هم مرسته وغواړي.
قريشي زیاتوي:« موږ ډېرې زیاتې هلې ځلې کړې دي، تر ولایتي مسوولینو مو هم د رسنۍ او خبریالانو غږ رسولی دی، مرکزي مسوولینو ته مو هم د دوی غږ رسولی دی. بیا به هم هڅه کوو، چې د خبریالانو غږ در ولایتي او مرکزي مسوولینو پورې ورسوو.»
په اروزګان کې د خصوصي رسنيو استازو په دغه ولايت کې د اقتصاد رياست څخه غوښتنه وکړه، چې نړيوال موسیسې دې وهڅوي ترڅو خصوصي رسنۍ له سقوط څخه وژغوري.
