د کورنیو چارو وزارت د پولیسو اکاډمۍ عمومي قوماندان عبدالحکیم همت اخوندزاده وایي، اوس مهال د پولیسو شمېر ۲۵۰ زرو ته رسېدلی دی.
د اخوندزاده په خبره، پولیس د ښارونو د امنيت په ټېنګښت او د قانون په پلې کولو کې اغېزناک رول لري او په ښه توګه د جرايمو مخنيوی کوي.
هغه په دې اړه وايي:« د پولیسو اوسنۍ اکاډمي کافي نه ده بلکې باید د کورنیو چارو وزارت په چوکاټ کې پر یوه عالي نظامي پوهنتون بدله شي. زموږ اکثریت ګاونډي هېوادونه هم د پولیسو پوهنتونونه لري. کله چې اکاډمي په پوهنتون واړول شي، هلته پوهنځۍ او څانګې زیاتېږي. اوسني وضعیت ته په کتو اړتیا ده چې لسګونه بېلابېلو څانګو او پوهنځیو کې پولیسو ته روزنه ورکړل شي.»
اخوندزاده وايي، شاوخوا ۲ زره ۵۰۰ تنه زده کړیالان په درېیو روزنیزو پروګرامونو کې تر روزنې لاندې دي اوڅه باندې۲۰۰ تنه پولیس سرتېري د ماسټرۍ پروګرام کې پر زده کړو بوخت دي.
اخوندزاده زیاتوي:« د شپې یا داخل خدمت پروګرامونو اړوند څانګو کې د کورنیو چارو وزارت برحاله افسرانو او ساتنمنانو ته د لیسانس او ماسټرۍ پر کچه اوږدمهاله زده کړې ورکوي او ظرفیتونه یې لوړوي. په دغو څانګو کې دا مهال تر ۲۵۰۰ محصلین پر زده کړو بوخت دي.»
په ورته وخت کې د اخوندزاده د پولیسو اکاډمۍ کې د مخکېني حکومت کارکونکو شمېر نږدې ۹۰۰ تنه ښيي او وايي، دغه کسان د ښوونکو په توګه پر دندو ګومارل شوي.
همت زیاتوي، په هغو برخو کې چې ښځینه پولیسو ته جدي اړتیا ده، په خپلو دندو پاتې دې او یوه یې هم له دندې نه ده ګوښه شوې.
هغه په دې اړه وايي:« د پولیسو اکاډمۍ په ګډون، په هغو ځایونو کې چې ښځینه پولیسو ته اړتیا ده، د تېر حکومت ښځینه پولیسې په خپلو دندو پاتې دي. له دې امله چې دامهال د پولیسو په اکاډمۍ کې د نجونو جذبولو پروګرام نه لرو، نو د نویو ښځینه ښوونکو ګومارنې ته هم اړتیا نه ده پېښه شوې. ښځینه پولیسې دا مهال د پاسپورټ ریاست په څېر هغو ځایونو کې خدمتي کار کوي چې هلته ورته جدي اړتیا ده.»
د کورنیو چارو وزارت د پولیسو اکاډمۍ قوماندان په خبره، اوسمهال د پولیسو په اکاډمۍ کې له ټولو ولایتونو او په ځانګړې توګه له هغو ولایتونو ډېر زده کړیالان جذب شوي چې په مخکېني حکومت کې لږه ونډه ورکړل شوې وه.
