د تحریک طالبان پاکستان یا ټي ټي پي پخواني ویاند احسان الله احسان هندۍ “د سنډي ګارډین “ورځپاڼې ته په یوه ليکلې مقاله کې ادعا کړې، چې د پاکستان او تاجکستان استخباراتي ادارې هڅه کوي د افغانستان سرپرست حکومت ضد ډلې تقویه کړي او خپلو اهدافو ته د رسېدو لپاره ترې ګټه واخلي.
نوموړي په مقاله کې ویلي، چې د دواړو هېوادونو استخباراتي ادارو د استازو ترمنځ د نیابتي ډلو د انسجامولو لپاره څو ناستې شوي، چې لومړنۍ دوې هغه يې د پاکستان په راولپنډۍ او وروستۍ یې په تاجکستان کې هغه مهال وشوه، چې د پاکستان استخباراتي ادارې پلاوي یاد هېواد ته په خپل سفر کې دوه اړخیز تړون لاسلیک کړ، چې له مخې به يې داعش او مقاومت نومې جبهه، د نيابتې ابزارو په توګه د خپلو اهدافو د ترلاسه کولو لپاره تقويه او کاروي.
د مقالې یوه برخه: «په دې وروستیو کې د پاکستان او تاجکستان د استخباراتي ادارو ترمنځ د نیابتي ډلو د تنظیم او یو ځای کولو څو غونډې شوې دي. لومړنۍ دوې غونډې د پاکستان په راولپنډۍ کې شوې وې او وروستۍ غونډه یې په تاجکستان کې هغه مهال وشوه، چې د پاکستان د استخباراتي ادارو پلاوي تاجکستان ته سفر وکړ، چې په کې دوه اړخیز تړون لاسلیک شو.»
د احسانالله احسان په مقاله کې د ادعاوو پر دوام زياته شوې، د دوشنبې او اسلاماباد ترمنځ په دې اړه شوې هوکړې له مخې، به د داعش ډلې خراسان څانګې ته اجازه ورکول کېږي چې تاجکستان کې په ښکاره توګه نوي بریدګر او ځانمرګي استخدام او په ګاونډیوهېوادونو کې یې د ناامنۍ لپاره وکاروي.
د مقالې له مخې، د یادې هوکړې پر بنسټ به د افغانستان په شمالي او یو شمېر نورو ولایتونو کې داعش ډله خپل بریدونه زیاتوي او د مقاومت نومې جبهه به له دې ناامنیو په ګټې اخېستو سره د خپلو هدفونو په لټه کې وي.
د مقالې یوه برخه: « د هوکړې له مخې، د کابل په ګډون په شمالي زون او یو شمېر نورو ولایتونو کې به د مقاومت جبهه خپل هدفونه لټوي او داعش به د ناامنیو د هڅولو لپاره ځانمرګي بریدګر چمتو کوي.»
د ټي.ټي.پي پخواني ویاند د خپلې مقالې په یوه برخه کې همدا راز ویلي، چې پاکستان ته بله لاره نده ور پاتې نو ځکه پاکستان د داعش او نورو ډلو پر مټ د افغانستان پر حکومت د فشار راوړلو وسیلې په توګه کار اخلي.
د سیاسي چارو شنونکو په باور د ګاونډيو هېوادونو له لوري په افغانستان کې د وسلهوالو ډلو تمويل د سیمې امنيت پر ګټه نه دی او له سرپرست حکومته غواړي، چې دا ډول پلانونو ته متوجه شي او هر هغه هېواد چې د افغانستان اوسنی امنیت ګډوډوي، پر وړاندې یې ودرېږي.
د سياسي چارو شنونکی شهسوار سنګروال: « موږ په بېلابېلو وختونو کې ولیدل چې د مقاومت په نوم ډله یا هغه ډله چې اسلامي امارت سره مخالفت لري، هغوی په وار، وار په تاجکستان کې پټې او ښکاره ناستې کړي؛ نو دا ټول هغه ثبتونه دي چې سړی ویلی شي داعش او د مقاومت د ډلې غړي په دغه دواړو هېوادونو کې د طالبانو پر ضد فعالیتونه کوي.»
د نړیوالو اړیکو شنونکی نجیب الرحمان شمال وايي: « هغوی هڅه کوي افغانستان بې ثباته کړي او هغه نسبي امنیت چې په افغانستان کې تامین شوی له منځه یې یوسي، حال دا چې په افغانستان کې ناامني او بې ثباتي د سیمې د امنیت، سولې او ثبات له منځه وړل دي او د سیمې هېوادونه هم له ګواښ سره مخ کوي؛ نو هرهغه هېواد چې غواړي افغانستان ناامنه کړي، اسلامي امارت باید د هغه هېواد کړنو ته جدي پاملرنه وکړي
د احسانالله احسان له لوري په ليکل شوې مقاله کې دا هم ويل شوي، چې د پاکستان ډېری دا ډول دسیسو پر وړاندې د سرپرست حکومت له لوري د پام وړ مقابله شوې او په خبره یې له همدې امله پاکستاني جنرالان اوس د دې پروژې د مؤثريت لپاره پر نویو تګلارو کار کوي.
د احسان الله احسان دغه مقاله چې په ۳ پاڼو کې لیکل شوې د نیابتي ډلو په تړاو د تاجکستان او پاکستان حکومتونو او یا څارګرو ادارو څه نه دي ویلي؛ خو د سرپرست حکومت په زندانونو کې لسګونه تنه تاجکستاني او پاکستاني وګړي چې له داعش سره تړاو لري بندیان دي.
