هغې زیاته کړې:« طالبان پر واګو ولکه لري،خو نه دي توانېدلي،چې د ترهګرو ډلو خلاف د ډاډ وړ مبارزه وکړي،په دې وروستیو کې د داعش خراسان څانګه،چې له توند لارې اسلامي دولت نومې ډلې سره تړاو لري، د روسیې او پاکستان په سفارتونو او پرهغه هوټل بریدونه وکړل،چې چینايي وګړي په کې میشت ول.»
خو د اسلامي امارت مرستیال ویاند بلال کریمي بیا وايي، په تیرو پنځو لسیزو کې دا لومړی ځل دی،چې افغانستان د یوه مرکزي نظام له لوري اداره کیږي او ټول سرحدونه یې تر کنټرول لاندې دي.
کریمي ډاډ ورکوي،چې په افغانستان کې هېڅ داسې ترهګره ډله او تحریک ځای نه لري،چې امنیت وګواښي او له افغانستانه نړۍ ته ګواښ پیښ کړي او په دې برخه کې زیات جدي دي.
کریمي زیاته کړې:«دلته یو مرکزي نظام رامنځ ته شوی او په ټول هېواد کنټرول لري او د هېواد ټول سرحدونه او قلمرو یې ترخپل کنټرول لاندې دي. دلته هېڅ نوع ډله او تحرک شتون نه لري،چې هغه ثابته نقطه ولري،فزیکي موجودیت دې ولري یا دې نورو ته ګواښ متوجه کړي. اسلامي امارت هم په دې برخه کې جدي دی،چې نورو ته د افغانستان له خاورې زیان متوجه نه شي.»
د یوناما مشرې روزا اتونبایوا د ښځو کار او زده کړو د حقونو په برخه هم اندیښنه ښودلې او زیاته کړې،چې پر دوی لګېدلي،محدودیتونه د منلو وړ نه دي او په دې برخه کې یې په پرمختګونو ټینګار کړی دی.
هغې زیاته کړې:« د ښځو حقونو تر پښولاندې کېدل د افغانستان یوه بله ننګونه ده،چې د زده کړو،کار او فردي ازادیو په برخه کې پر افغان مېرمنو د طالبانو له لوري لګول شوي محدودیتونه دمنلو وړ نه دي.»
د ملګرو متلونو امنیت شورا ته د راپور وړاندې کولو پرمهال اوتونبایوا دافغانستان ګڼو ولایتونو ته د خپلوسفرونو په تړاو هم مالومات ورکړل،چې په وینا یې افغانان له سخت اقتصادي وضعیت سره مخ دي او د ژوند لومړنیو اړتیاوو ته لاس رسی نه لري.
اتونبایوا زیاتوي:«څه چې پر ما یې زیات اغیز وکړ،هغه د افغانانو بد مرغۍ وې،چې څومره په بې وزلۍ او بد اقتصادي حالت کې ژوند کوي،د دغو لېدنو پرمهال ډېرو راته وویل، په سختۍ ژوندي پاتې دي.»
په غونډه کې د ناورې بهرنیو چارو وزیرې انیکن هویټفلډ له نړیوالې ټولنې وغوښتل،چې له افغانانو سره بشري مرستې زیاتې کړي،چې په سخت ژمي کې خلک له لوږې او سړې هوا سره مخ دي.
هویتفلډ زیاتوي:« افغانان له یوه بل سخت ژمي سره مخ دي، خلک لوږه او ساړه ګالي، د افغانستان دوه پر درې سلنه وګړي بېړنیو بشري مرستو ته اړتیا لري،دا حالت په ځانګړې توګه د ښځو او نجونو لپاره ډېر سخت دی.»
په افغانستان کې د ملګرو ملتونو استازې ډیورنډ فرضي کرښې ته څېرمه د افغان ځواکونو او پاکستاني پوځ ترمنځ د نښتو پر زیاتوالي هم اندیښنه وښوده.
