د مخابراتي خدمتونو د تنظیم ادارې( اترا) یو خبري ناسته کې د تېر کال لاسته راوړنو راپور شریک کړ.
د مخابراتي خدمتونو د تنظیم اداره وایې، د نورو ننګونو ترڅنګ مخابراتي شرکتونه د مخابراتي او انټرنیټي خدمتونو په وړاندې کولو کې ملامت دي.
د دغې ادارې مشر وایې، تیرو ۳ میاشتو کې هر مخابراتي شرکت د ټیټ کیفیته خدمتونو له امله سل میلیونه افغانۍ جریمه پریکړې ده.
له دې سره یوشمیر هېوادوال د مخابراتي شرکتونو له اوسنیو خدمتونو شکایت لري او مخابراتي شبکې د پیسو پر غلا کولو تورنوي.
مسوولین وایي په تیرو ۳ میاشتو کې دغې ادارې ته د هېواد له بېلابیلو برخو نږدې ۶ زره شکایتونه رسیدلي دي.
د دې ادارې مشر محمد نجیب عزیزي مخابراتي شرکتونه د پیریدونکو لپاره د ښه مخابراتي او انټرنیټي خدمتونو رسولو کې ناکام یاد کړل.
له دې سره هرات ولایت کې په ټولنیزو رسنیو کې له ټیټ کیفیته مخابراتي او انټرنیټي خدمتونو شکایتونه ډیر شوي او دې برخه کې اترا اداره پړه ګڼل شوې.
د اترآ اداره بیا وایي د پخوا پرتله د مخابراتو او انټرنیټي خدمتونو رسولو ساحه پراخه شوې، ښوونیزی، تحصیلي، رسنیزې ،روغتیایي او د عامه خدمت رسونې ادارې له مخابراتي سیستم سره نښلول شوې دي.
د اترا د مالوماتو لمخې اوس مهال د پنځه مخابراتي شرکتونو او د انټرنیټي خدمتونو پنځوس شرکتونو لخوا پر دغه سکتور ۳ میلیارد ډالر پانګونه شوې ده.
مسوولین وایي، پام کې لري چې راتلونکو دوه کلونو کې د مخابراتي او انټرنیټي خدمتونو لګښتونه پنځوس سلنه راکم کړي.
