د کار او ټولنیزو چارو وزارت د بې کارۍ له منځه وړلو په برخه کې د خپلو هڅو خبر ورکوي.
د یاد وزارت مسوولین وایي، په تېر۱۴۰۳ لمریز کال کې دغه وزارت بریالی شوی چې د کارموندنې د ۲۳ شرکتونو فعاليتونه وپلټي او په دې توګه يې د يادو شرکتونو د خدمتونو څرنګوالی او مؤثريت تثبيت کړی دی.
د کار او ټولنیزو چارو وزارت ویاند سمیع الله ابراهیمي په دې اړه د ارزونو په لړکې تېر کال ۵ نویو شرکتونو ته د فعالیت جوازونه صادر او همدا راز د ۱۱ شرکتونو جوازونه لغوه شوي دي.
ابراهیمي زیاتوي: « د کار او ټولنیزو چارو وزارت د بشري ځواک عمومي ریاست اړوند د کارموندنې د خصوصي شرکتونو د انسجام څانګه په دې باندې توانېدلې ده چې په تېر کال کې له ۲۰ زیاتو خصوصي شرکتونو پلټنه وکړي. له دې ډلې پنځو نویو شرکتونو ته د کارموندنې په برخه کې د فعالیت جوازونه ورکړي دي.»
د کار او ټولنیزو چارو وزارت ویاند دغه راز وايي، تېر کال د کارموندنې خصوصي شرکتونو د هڅو په پايله کې شاوخوا ۳ زرو کسانو ته کاري فرصتونه برابر شوې دي.
ابراهیمي په دې اړه وايي: « له نېکه مرغه ۷ زره ۳۰۰ څخه زیاتو هېوادوالو یادو شرکتونو ته د کارموندنې په موخه مراجعه کړې چې له ډلې یې شاوخوا ۳ زره او ۵۰۰ کسانو ته په خصوصي سکټور، شرکتونو او موسسو کې د کار زمینه برابره شوې ده.»
په ورته مهال، یو شمېر هېوادوال په غیر قانوني لارو له هېواد څخه د ځوانانو د مهاجرت اړوند مجبوريتونو ته په کتو وایي، که سرپرست حکومت کاري فرصتونه برابر نه کړي، ښايي له هېواده د کډوالۍ کچه لازیاته شي.
د کابل اوسېدونکی احمد سیر وايي: « دا مهال خلکو او په ځانګړې توګه ځوانانو ته د کار زمینه برابره نه ده او په داسې حال کې چې ګڼ شمېر کسان له پوهنتونونو د کادر په توګه فارغ دي، تر لېسانس، ماسټرۍ او دوکتورا پورې زده کړې لري، خو له بې کارۍ ځورېږي. دغه کسان مجبور دي چې دلته د بې کارۍ له امله، په غیر قانوني، قاچاقي او خطرناکو لارو بهرنیو هېوادونو ته مهاجرت وکړي.»
د کابل یو تن اوسېدونکی مرتضی وايي: « ډېر کسان او زموږ خپل ملګري همدا اوس په ډېرو سختو لارو ایران ته روان دي. که دوی ته په هېواد کې دننه د کاروبار زمینه برابره شي، له یوې خوا به هېواد جوړ شي، اقتصادي ګټه به ولري او له بلې خوا به بهرنیو هېوادونو ته له تلو هم مخه ونیول شي.»
د کاري فرصتونو د کموالي په اړه د عامو خلکو اندېښنې په داسې حال کې دي چې د ملګرو ملتونو وروستیو موندنو له مخې، د افغانستان شاوخوا۵۰ سلنه وګړي له ۲۴ تر ۶۵ کالونو عمر لرونکي دي چې د نړۍ پر کچه د ځوانې بشري قوې له مخې له ۲۰ مخکښو هېوادونو ګڼل کېږي.
