آریانا افغان هوايي شرکت له دې وروسته په اوونۍ کې دوه ځله د چین اورومچي ښار ته الوتنې لري.
د یاد شرکت مسوولینو په دې تړاو جوړه شوې ناستې ته خبرو کې وویل، دغه ګام یې د مسافرو او سوداګرو ستونزو او اړتیاوو ته په کتو پورته کړی.
د یاد شرکت رییس عبدالولي صدیقي وايي، هڅه کوي دا خدمات په راتلونکي کې لا پراخ کړي او په دې لټه کې دي چې د آريانا افغان هوايي شرکت د خدماتو د کیفیت له اړخه د نړۍ په ۱۰ غوره هوايي شرکتونو کې شامل کړي.
صدیقي زیاتوي:« موږ چین هېواد ته په اوونۍ کې یو پرواز درلود، خو د خلکو او سوداګرو د اړتیاوو په پام کې نیولو سره به دغه کچه اوونۍ کې دوو الوتنو ته لوړه شي.»
بل پلو په کابل کې د چین سفیر د دواړو هېوادونو اړیکې لرغونې یادوي او وايي، اوس مهال د دواړو هېوادونو ترمنځ سوداګریزې اړیکې پراخې شوې دي او سیاسي هغه هم د پخوا په پرتله ژورې دي.
ژاوو شینګ زياتوي، د افغانستان او چین ترمنځ هوايي الوتنې شاخوا ۲۲کاله مخینه لري، خو دغه الوتنې په ۲۰۲۳زېږدیز کال له سره پیل شوې او په پايله کې يې تر دې دمه شاوخوا ۸ زره مسافر او څه باندې ۶۰ زره ټنه توکي انتقال شوي.
ژاوو شینګ په دې اړه وايي: « د چین ـ افغانستان مستقیمې الوتنې چې له ۲۰۰۳ کال راهیسې پیل شوې دي، نه یوازې د خلکو ترمنځ د تبادلو مهمه وسیله ده، بلکې د توکو د انتقال یوه مهمه لاره هم ده. په ۲۰۲۳ کال کې بیا پیل شوې او تر دې دمه یې له ۸ زره زیات مسافر انتقال کړي او تر۶۰ زرو ټنو يې ډېر توکي لېږدولي دي. د الوتنو زیاتوالی به خامخا د خلکو ترمنځ اړیکې نږدې کړي او د دواړو هېوادونو ترمنځ سوداګریزه همکاري به پیاوړې کړي.»
بل پلو، بهرنیو چارو وزارت د چین او افغانستان ترمنځ د الوتنو زیاتوالی د دواړو هېوادونو ترمنځ د هراړخیزو اړیکو د ټنیګښت بېلګه ګڼي.
د دې وزارت مالي او اداري معین محمد نعیم وردګ وايي، سرپرست حکومت په دې هڅه کې دی چې له چین سره سیاسي، اقتصادي او سوداګریزې اړیکې لاپسې پیاوړې کړي.
وردګ زیاتوي: «هرڅومره چې د ولسونو ترمنځ اړیکې پراخېږي، په همدې اندازه د دوی ترمنځ سیاسي روابط هم تقویه کېږي. د افغانستان اسلامي امارت د بهرنیو چارو وزارت پالیسي دا ده چې غواړو له ټولنې نړۍ سره د خپلو ارزښتونو او ګټو په چوکاټ کې مثبتې اړیکې جوړې کړو.»
دا په داسې حال کې ده چې د دولتي شرکتونو د مسوولینو په خبره، هڅه دا ده چې په راتلونکي کې دېته ورته د نورو دولتي شرکتونو ملاتړ ته هم ادامه ورکړي او په همدې موخه اوس مهال د ځینو پروژو عملي چارې هم پیل شوې دي.
