پاکستانۍ ورځپاڼه نیشن وايي، پاکستان ته د ولسمشر غني ورتګ او له عمران خان سره یې لیدنه د امریکا په غوښتنه کېږي.
پاکستانۍ ورځپاڼې نیشن د پاکستان د بهرنیو چارو وزارت د ځینو سرچینو په حواله لیکلي چې امریکا له افغان او پاکستاني چارواکو غوښتنه کړې چې خپلې اړیکې ښې کړي.
ښايي ولسمشر غني د روانې میلادي میاشتې په وروستیو کې پاکستان ته سفر وکړي.
ورځپاڼې لیکلي د امریکا او طالب استازو ترمنځ خبرو ته هم پاکستان لاره هواره کړې او ښایي په همدې تړاو د پاکستان لومړی وزیر عمران په نږدې راتلونکي کې د امریکا له ولسمشر ډونالډ ټرمپ سر خبرې وکړي.
له دې سره د افغانستان د ملي امنیت شورا سلاکار حمدالله محب کابل کې د پاکستان له سفیر زاهد نصرالله خان سره کتلي او پر بېلا بېلو موضوعاتو په ځانګړې توګه له ترهګرۍ سره د مبارزې لپاره پر سیمه ییزو همکاریو او پاکستان ته د اشرف غني د سفر په اړه خبرې کړي.
حمدالله محب او زاهد نصرالله، پاکستان ته د ولسمشر غني سفر چې د پاکستان د لومړي وزیر په بلنه ترسره کېږي، بیلا بیلو برخو کې د دواړو هېوادونو ترمنځ د همکاریو د نوې پاڼې پرانېستو لپاره ښه فرصت یاد کړی.
