خلیلزاد له افغان حکومت او طالبانو غوښتي چې سولې ته غېږ ورکړي.
د طالب او امریکایي مرکچیانو خبرې له یوې ورځې دمې وروسته بیا پیل شوې.
د مالوماتو په اساس دواړه لوري په یو لړ موضوعاتو وروستي توافق ته هم نږدې شوي دي.
د دواړو لورو مرکچیان اوس په دې بحث کوي چې مسوده د اسلامي امارت که د طالبانو تحریک تر سرلیک لاندې لاسلیک کړي.
زلمي خلیلزاد بیا پر طالبانو او افغان حکومت غږ کړی چې تاوتریخوالي د کمولو لپاره دې جدي کار وکړي.
د روژې میاشتې په احترام طالبانو او امریکايي مرکچیانو لومړی ورځ په رخصتۍ تېره کړه، خو د سه شنبې په ورځ دواړه لوري خپل تاریخي او حساس مسولیت باندې بحثونه پیل کړي.
له لومړي سره تمه دا وه چې شپږم پړاو خبرې به له لاسته راوړنو ډکې وي، هغه څه چې اوس د زیات پرمختګ خبره کیږي.
دواړه لوري به په دوو موضوعاتو له توافق وروسته په اوربند او بین الافغاني خبرو بحث پيل کړي.
زلمي خلیلزاد په طالبانو او افغان حکومت غږ کړی چې د تاوتریخوالي پای لپاره دې کار وکړي.
خلیلزاد داسې ویلي ((له ډېرې مودې راهيسې افغانانو جګړه تجربه کړې او زغملې په دې هيله ،چې اوس وخت کې يو بل ته له ستونزو تېر شي او د تاوتريخوالي پايته رسولو ته ژمنتيا و ښيي او سولې ته غېږ ورکړي.))
سولې عالي شورا د تېر په څېر د خبرو هر کلی کوي، مګر له زلمي خلیلزاد یې لویه غوښتنه دا ده چې طالبان له دوی سره خبرو ته کینوي.
تراوسه مالومه نه ده چې دا ځل به د زلمي خلیلزاد او طالبانو تر منځ خبرې څو ورځې دوام وکړي، خو تمه شته چې دا ځل خبرو کې یوې پایلې ته ورسیږي.
تر دې وړاندو بحثونو کې خلیلزاد ویلي و چې په هر څه بحث کیږي، خو تر څو چې په ټولو موضوعاتو هوکړه و نه شي، په هیڅ هم هوکړه نه کیږي.
