ټاکل شوې چې نن دوشنبه به زلمی خليلزاد د افغان سولې په تړاو اسلام اباد ته لاړ شي.
له خليلزاد سره په دغه سفر کې د امریکا د بهرنيو چارو وزارت د جنوبي او منځنۍ اسيا استازې اېلس ويلز هم ملتیا کوي.
د پاکستان د بهرنیو چارو وزارت ویاند محمد فېصل ويلي، دغه سفر د افغان سولې د بهير، دوه اړخيزه اړيکو او د مشورو په تړاو ده.
خليلزاد له ولسمشر محمد اشرف غني سره په کابل کې ليدلي او د افغانانو تر منځ د سولې په خبرو یې ټینګار کړی.
د تیرې پنجشنبې ورځ د پاکستان لومړي وزیر عمران خان ویلي و چې پاکستان د افغانستان د امن په ګډون د بېن الافغاني خبرو ملاتړ کوي چې خلیلزاد یې ستاینه هم کړې وه.
افغان حکومت د عمران خان وروستۍ خبرې د افغانستان په داخلي چارو کې لاسوهنه بللې وه.
له دې سره د امريکا د مرکزي قوماندانۍ مشر ډګر جنرال کنيټ مکنزي تیره ورځ په واشنګټن کې له الحُره ټلويزيون سره په مرکه کې ويلي، باور لري چې افغانستان کې په هر حل کې بايد پاکستان دخيل وي.
مکینزي ویلي، پاکستانيان هڅول شوي او په دې برخه کې مرستې ته لېوال دي.
تر دې وړاندې امریکایي او افغاني چارواکو پاکستان تورن کړى و چې افغانستان کې د لانجې په حل کې ریښتینې همکاري نه کوي.
د پاکستان لومړي وزیر عمران خان وروستيو څرګندونو چې ويلي يې و، افغانستان کې دې موقت حکومت تشکيل شي، د افغانستان تند عکس العمل پارولى و.
