ولسمشریزو ټاکنو لپاره د ۱۲ نوماندانو ایتلاف مشورتي جرګه تحریم کړه.
د اجرایه ریس په ګډون د سولې عالي شورا مشر کریم خلیلي هم په لویه مشورتي جرګه کې برخه نه اخلي.
هغوی چې جرګې سره بایکاټ اعلان کړی باور لري چې جرګه د سولې د سبوتاژ لپآره ده او ولسمشر په کې خپل ټاکنیز کمپاین کوي.
ها خوا د جرګې لپاره د چمتوالي کمېټه وایي له سیاسي څېرو سره یې په دې اړه خبري کړي خو کومې پایلې ته نه دي رسېدلي.
حکومت کابل ته د سولې په اړه لویه مشورتي جرګه رابللې چې د دوشنبې پر ورځ به د ولسمشر غني له لوري پرانستل کېږي.
دا جرګه چې د ۱۸ کلنې جګړې په پای به په کې بحث کېږي د حکومت سیاسي او وسلوالو مخالفینو له لوري تحریم شوې ده.
کابل کې د ولسمشریزو ټاکنو لپآره ۱۲ نوماندانو ایتلاف اعلان وکړ چې جرګه د سولې د سبوتاژ لپاره رابلل شوې ده.
له دې سره کابل کې حرکت انقلاب اسلامي او د سولې عالي شورا مرستیال هم له جرګې سره بایکاټ اعلان کړ چې په باور ولسمشر غني غواړي د جرګې له لارې ځان ته کمپاین وکړي.
په سبانۍ جرګه کې د حکومت اجرایه مشر عبدالله عبدالله او د سولې عالي شورا مشر کریم خلیلي هم برخه نه اخلي.
خو د مشورتي لویې جرګې دارلانشاء وایي، سیاسیونو سره کومې پایلې ته نه دي رسېدلي خو وړاندیزونه یې اخیستل شوي چې جرګه کې به د بحث لاندې ونیول شي.
د مشورتي لویې جرګې ټول برخوال کابل ته رارسېدلي دي او په دې اړه ټول چمتوالی نیول شوی دی.
