امریکا په افغانستان کې د خپل حضور په تړاو سیمې ته قناعت نه دی ورکړی.
امریکا اوس هم د سیمې هېوادونو ته قناعت نه دی ورکړی چې افغانستان کې خپل حضور په څه ډول پای ته رسوي.
یو طالب چارواکي شمشاد ته ویلي، امریکا د سیمه ییزې اجماع په لټه کې ده خو که سوله غواړي ښه ده چې افغانستان کې کورني بعد ته پاملرنه وکړي.
اوس باور کېږي چې د سیمې هېوادونه طالبانو ته ځانګړې اجنډاوې ورکوي چې امریکا کارونه یې سخت کړي خو طالبان بیا بل ډول فکر لري.
د افغانستان سولې لپاره د امریکا ځانګړی استازی زلمی خلیل زاد طالبانو سره له هر پړاو خبرو مخکې او شاته د سیمې او نړۍ په هغو هېوادونو ګرځېدلی چې دلته په جګړه او سوله کې یې رول مهم دی.
خو هغه طالب چارواکي چې نه غواړي نومونه یې په رسنیو کې خپاره شي شمشاد ته وویل، امریکا د سیمې هېوادونه ته قناعت نه دی ورکړی چې افغانستان کې خپل پوځي حضور په څه ډول پای ته رسوي.
طالب چارواکي داسې ویلي (( امریکا غواړي یوه سیمه ییزه اجماع جوړه کړي چې دا یو ښه ګام دی، خو دا چې پرلپسې په سیمو هېوادونو ګرځي تر اوسه یې د سیمو هېوادونو ته قناعت نه دی ورکړی چې دوی سوله غواړي او کنه؟ که امریکا سوله غواړي نو افغانستان کې دې داخلي بعد ته پاملرنه ډېره کړي. د نړۍ لوی قووتونه د امریکا په نیت شک لري چې د اشغال موضوع څه ډول پای ته رسوي.))
خو د وسلوالو طالبانو ویاند په دې باور دی چې د سیمې هېوادونو سره د امریکا لیده کاته ټول د دې لپاره دي چې خپله ماته په دې پلمه توجې کړي چې ګڼي وتل یې له افغانستان څخه دوی سره په تفاهم کېږي.
کابل کې بیا داسې انګېرل کېږي چې د سیمې هېوادونه طالبانو ته اجنډاوې ورکوي او دې کار د امریکا کار پېچلی کړی .
په منطیقوي لحاظ د افغانستان په اړه سیاستونه بدل شوي او امریکا دلته له هېوادونو سره ځینې مشترکات لري چې ګټې او تاوانونه یې یو ډول دي.
په مسکو کې د امریکا، روسیې او چین درې اړخیزه ناسته کې په جګړه کې له ښکیلو غاړو غوښتل شوي چې اوربند وکړي.
