د طالبانو د الفتح په نوم عملیاتو باندې خلیلزاد، ارګ او عامو خلکو غبرګونونه ښودلي.
د افغان سولې لپاره د امریکا د بهرنیو چارو وزارت ځانګړي استازي د طالبانو د پسرلني عملیاتو پیل یو بې باکه عمل بللی دی.
له دې سره پوځي کارپوهان د سولې په خبرو ټینګار لري او ویره لري چې د جګړې دوام به افغانستان د لا نورو پرمختګونو راوګرځوي.
د سولې له خبرو سره یو ځای طالبانو د الفتح په نوم عملیات اعلان کړل چې د سولې د خبرو په جریان کې به یې جګړه هم شدت پيدا کړي.
د طالبانو د پسرلنیو عملیاتو له اعلان وروسته زلمي خلیلزاد خواشیني ښودلې چې په داسې یو وضعیت کې طالبان د جګړې اعلان کوي چې خلک سوله غواړي.
زلمي خلیلزاد داسې ویلي ((د طالبانو د پسرلنیو عملیاتو اعلان یو بې باکه عمل او نامسولانه کار دی، په داسې حال کې د حکومت د امنیتي پلان له اعلان وروسته طالبانو د تاوتریخوالي د زیاتوالي اعلان وکړ، چې افغان ولس په ډیره څرګنده د سولې پلوي کړې ده .))
له دې سره ارګ خواشیني ښودلې چې د افغان حکومت په نوښت او ټینګار افغانستان کې د تحمیلي جګړې د پایته رسولو لپاره هڅې په شدت سره دوام لري خو طالبانو بیا جګړې ته مخه کړه.
ارګ داسې ویلي ((طالبان په داسې حال کې پر جګړې ټینګار کوي چې د افغانستان او اسلامي نړۍ جیدو علماوو د طالبانو جګړه فتنه ګڼلې او د دریدو غوښتنه یې. د طالبانو په لیکو کې جنګیدونکو ځوانان دې ددغې ډلې د رهبرۍ او سیمه ییزو ملاتړو د موخو وسیله نه ګرځي.))
د الفتح په نامه د طالبانو له عملیاتو سره یو ځای انديښنې دي چې طالبانو تراوسه د خلکو باور لاس ته نه و راوړی چې سوله کوي، خو بیرته یې جګړې ته مخه کړه.
ټینګار دا دی چې اتلس کلنې جګړې پرته له بربادۍ او وژنو بل څه لاس ته نه دي راوړي، نو دوام به یې لا ډير خرابی رامنځ ته کړي چې افغانان به یې بیا کلونه نه شي جبران کولی.
