په اسلاماباد کې افغان سفیر ددغه هېواد د بهرنیو چارو وزیر سره وکتل.
پاکستان کې افغان سفیر شکرالله عاطف مشعل د پاکستان د بهرنیو چارو وزیر شاه محمود قریشي سره کتلي او پر مهمو دوه اخیزو موضوعاتو یې خبرې کړي.
دغه لیدنه چې نن له غرمې وروسته شوې د دواړو هېوادونو ترمنځ د اړیکو په پیاوړتیا، د سوداګړۍ په ودې، د افغانستان د سولې پروسه کې د پاکستان په صادقانه همکارۍ، په پاکستان کې د افغان کډوالو په ستونزو او یو لړ نورو مهمو موضوعاتو خبرې اترې شوي.
د پاکستان د بهرنیو چارو وزیر افغان سفیر ته د افغانستان په هکله د پاکستان د لومړي وزیر ښاغلي عمران خان د وروستیو څرګندونو په اړه د پوره وضاحت ترڅنګ، د دې ډاډ ورکړ چې پاکستان په هیڅ ډول د افغانستان په کورنیو چارو کې د لاسوهنې هوډ نه لري او نه ځانته دا حق ورکوي.
قریشي زیاته کړه چې پاکستان د افغانستان ملي حاکمیت ته په درنه سترګه ګوري او په راتلونکي کې به له دې ډول څرګندونه څخه په جدي توګه ډډه وشي. همداراز په دغې لیدنه کې په نږدې راتلونکې کې د دواړو هیوادونو د علماوو ترمنځ د یو ګډ کنفرانس په جوړیدو هم بحث شوی او د پاکستان د بهرنیو چارو وزیر په یادو برخو کې د هرراز عملي همکارۍ ژمنه کړې.
