ولسمشر غني کار کوي چې د افغانستان د څلویښت کلونو کړکیچ ته پای پیدا کړي.
ولسمشر غني چې د اروپايي ټولنې د بهرني سیاست مشرې سره یې په خبري کنفرانس کې خبرې کولې وویل، تر څو چې د اسیا زړه ثبات پیدا نه کړي په اسیا کې رامنځته کېدونکی تحول نشي بریالی کیدلی.
ولسمشر باور لري چې د ازموینې پر مهال وارخطايي منفي پایلې درلودلی شي.
اروپايي ټولنې هم د افغانانو په مشرۍ د سولې له بهیر ملاتړ اعلان کړ.
په دې خبري ناسته کې ولسمشر محمد اشرف غني او د اروپايي ټولنې د بهرني سیاست مشرې د ځینو نورو موضوعاتو تر څنګ په سوله هم خبرې وکړې.
خبري غونډه کې سوالونه او ځوابونه نه وو، خو ولسمشر د سولې په تړاو له کنایو ډکې خبرې درلودې.
ولسمشر د سولې روانو هڅو ته په کتو وویل، ازموینه کې وارخطايي، منفي پایلې درلودای شي.
ولسمشر یو ځل بیا په ډاګه کړه چې د اسیا د ثبات لپاره د افغانستان ثبات اړین دی او د مرمۍ او تهدید په زور سوله د بل منفي پړاو پیل دی.
له دې سره د اروپايي ټولنې د بهرني سیاست مشرې ټینګار وکړ چې حکومت دې د سولې له رامنځته شوي فرصت ګټه واخلي او اروپايي ټولنه به همکاري ورسره وکړي.
د اروپايي ټولنې د بهرني سیاست مشرې فدریکا موګیراني داسې وویل (( نن افغانستان د تاریخ په ډیر مهم پړاو کې دی ځکه دوی د سولې د فرصت یوه بې سارې کړکۍ موندلې ده چې د ډیرو مسایلو په تړاو مذاکرات وکړي. او دا پروسه مخ ته یوسي، دا هرڅه د افغان حکومت نوښت دی او باید له لاسه ور نه کړل شي.))
د افغان سولې پروسه اوس حساس پړاو ته رسیدلې چې په نیږدې راتلونکې په دې تړاو د دو ناستو جوړیدو تر څنګ د موقت حکومت د جوړیدو بحثونه هم مطرح کیږي، خو د سولې خبرو ښکېل اړخونه د موقت حکومت جوړیدل په اوس کې ردوي.
