د پاکستان لومړي وزیر یو ځل بیا افغانستان کې د موقت حکومت د جوړېدو غوښتنه کړې.
د پاکستان اکسپرس تربیون د راپور له مخې لومړي وزیر عمران خان ویلي، افغان حکومت د سولې خبرو پر وړاندې خنډ دی او موقت حکومت ته اړتیا شته.
هغه همداراز ویلي، له طالبانو سره یې لیدنه د افغان حکومت د نیوکو له امله لغوه شوه.
عمران خان ویلي، نه پوهېږي چې افغانستان کې به د موقت حکومت جوړېدو او یا هم د ټاکنو ترسره کېدل به څومره وخت ونیسي.
د افغانستان سولې په تړاو د روسیې، چین او امریکا ناسته
ټاکل شوې چې روسیه، امریکا او چین د افغانستان په تړاو دویمه درې اړخیزه ناسته دوه اوونۍ وروسته وکړي.
د روسیې د بهرنیو چارو وزارت ویلي، ممکن دغه درې اړخیزه ناسته د راتلونکو دوه اوونیو په اوږدوکې ترسره شي.
افغانستان لپاره د روسیې ځانګړي استازي ضمیر کابلوف ویلي، لا تر اوسه کره نېټه مالومه نه ده، خو دوی هڅې کوي چې ورځ ځانګړې کړي او په راتلونکو لس ورځو یا دوه اوونیو کې دغه ناسته وکړي.
د چین، روسیې او امریکا ترمنځ د افغانستان په اړه لومړۍ درې اړخیزه ناسته په امریکا کې وشوه او اټکل دی چې دویمه ناسته به په مسکو کې برابره شي.
په پام کې ده چې درې واړه لوري به افغانستان کې د شخړې په حل او سیاسي جوړجاړي خبري وکړي.
قطر کې د افغان سیاسیونو ناسته
د طالبانو او افغان سیاسیونو تر منځ جوړیدونکې ناسته به په سوله باور لا زیات کړي.
ویل کېږي لږ تر لږه سل افغان سیاسیون د قطر غونډه کې د ګډون لپاره په چمتوالي بوخت دي.
ځینې ناتایید شوي راپورونه وايي، چې د افغان حکومت ځینې استازي به په ناسته کې د عادي کسانو په څېر ګډون وکړي.
څو ورځې وړاندې د سولې شورا د دارالانشاء مشر محمد عمر داودزي وویل، دوی له حکومکت سره خبرې کوي چې ایا د قطر غونډه کې ګډون وکړي او که نه؟
