.د طالبانو او افغان سیاسیونو تر منځ جوړیدونکې ناسته به په سوله باور لا زیات کړي
په راتلونکې یوه میاشت کې به قطر د افغان سولې په تړاو د دوو ناستو کوربه وي.
د امریکایانو او طالبانو د ناستې تر څنګ به افغان سیاسیون هم له طالبانو سره د قطر په کوربتوب ځانګړې ناسته ولري.
د دې ناستې لپاره چمتوالی روان دی او په پام کې ده چې د راتلونکې اپریل میاشتې په نیمايي کې وشي.
لږ تر لږه سل افغان سیاسیون د قطر غونډه کې د ګډون لپاره په چمتوالي بوخت دي.
ځینې نا تائید شوي راپورونه وايي چې د افغان حکومت ځینې استازي به په ناسته کې د عادي کسانو په څېر ګډون وکړي.
د مالوماتو له مخي د مسکو د ناستې د یو شمېر ګډونوالو سربېره به لږ تر لږه سل کسان په دې ناسته کې ګډون وکړي.
د حکومت له ادرسه تر اوسه په ناسته کې د ګډون او نه ګډون څه نه دي ویل شوي خو ځینې ناتایید شوي راپورونه وايي، که فرضا د حکومت برحاله چارواکي په ناسته کې ګډون وکړي د حکومت له ادرسه نه بلکې د نورو په څېر به عادي ګډونوال وي.
تحلیل دا دی چې دغه ناسته به د سولې خبرې لا پياوړې او د بین الاافغاني مذاکراتو ته د رسیدو لپاره به باور زیات کړي.
د مالوماتو له مخې د روانې میاشتې په وروستیو کې به امریکایان او طالبانو شپږم پړاو خبرو ته داخل شي او له هغې وروسته به د سیاسیونو او طالبانو تر منځ د مسکو ناستې په دوام دویمه ناسته ترسره شي.
