ولسمشر غني هیله وښوده چې روان کال به د سولې، ورورولۍ او دوستۍ کال وي.
محمد اشرف غني چې مزار کې یې د نوروز دودیزو مراسمو کې وینا کوله وویل، راتلونکو څلور کلونو کې باید افغانستان خپله عادي بودیجه برابره او له وارداتي په صادراتي هېواد بدل شي.
ولسمشر غني وایي، نه غواړي د داسې یو هېواد ولسمشر شي چې سل کسان میلیونر وي او څلوېشت سلنه نور خلک له لوږې ومري.
د ټاکنو کمېسیون د پرېکړې له مخې به ولسمشریزې ټاکنې د ۹۸ کال د میزان میاشتې په شپږمه و شي.
ولسمشر محمد اشرف غني د ټاکنو کمېسیون دغه پرېکړه مني، خو له هغې وروسته ورته نور ځنډ د منلو وړ نه دی.
غني یو ځل بیا له ټولو دولتي کسانو غوښتنه وکړه چې د ټاکنو برخه کې بې طرفه پاتې شي.
ولسمشر غني چې د ۹۸ کال د پسرلي جشن مراسمو کې یې خبرې کولې وویل، راتلونکو څلور کلونو کې باید افغانستان خپله عادي بودیجه خپله برابره کړي او له وارداتي هېواد په صادراتي بدل شي.
هغه وایي، د افغانانو بې وزلي او لوږه ورته د منلو نه ده او نه غواړي د داسې هېواد ولسمشر واوسي چې سل کسان میلیونر وي او ۴۰ ٪ نور خلک له لوږې ومري.
اشرف غني هیله وښوده چې ۹۸ کال به د سولې، ټاکنو او پرمختګ کال وي او راتلونکی کال به بلخ د چین او منځنۍ اسیا په سوداګریزې دروازې بدل کړي چې د ځمکې او اوبو له لارې به افغان صادرات چین ته ولیږدول شي.
د شاه امان الله خان د وخت ماڼۍ بیا رغونه او د اوبو مدیریت دوه نور هغه موضوعات دي چې د غني په وینا د خپلواکۍ د سلمې کلیزې په پوره کیدو به یې دوی خوندي کړي.
ولسمشر افغانستان د اسیا زړه وباله چې په خبره یې سقوط به یې د ټولې اسیا سقوط وي.
د غني په خبره اوس افغانستان مرکزي اسیا سره تړل شوی چې دا به د ټولې اسیا لپاره مثبت بدلون ورکړي.
ولسمشر یو ځل بیا د افغان ځواکونو ستاینه وکړه چې په خبره یې د جګړې سربیره د سولې او ثبات لپاره کار کوي.
په اخر کې هغه هیله وښوده چې روان کال به د سولې، ورورولۍ او دوستۍ کال وي.
