افغانستان کې د لومړي ځل لپاره د خبریالانو ملې ورځ ونمانځل شوه.
د کب نهمه د خبریالانو ملي ورځې په مناسبت د خبریالانو د وروستي وضعیت په تړاو کلنۍ راپور وړاندې شو چې له مخې یې تېر کال د خبریالانو لپاره خونړی و.
ارګ اطلاعاتو ته د لاسرسي او بیان آزادي برخه کې اوسنۍ دوره بریالۍ یاده کړه چې زیات پرمختګونه شوي.
د خبریالانو د ملي ورځې په مناسبت د هېواد په کچه یوولس خبریالان ستایل شوي چې دوه پکې د شمشاد ټلویزیون و.
په دې مناسبت جوړه شوې غونډه کې د کال غوره راپورونه و ارزول شول چې یوولس غوره یې وستایل شول.
په دې قطار کې د شمشاد ټلویزیون د ننګرهار خبریال لطیف احساس او د کونړ خبریال زمان سهیل هم د غوره راپور جوړولو باندې ستایل شوي دي.
د ولسمشر دویم مرستیال په دې غونډه کې د رسنیو د وروستیو کلونو پرمختګونه ستایلي او ډاډ یې ښودلی چې د بیان ازادۍ برخه کې به لا ډيرې هڅې وکړي.
د افغانستان د خبریالانو مرکز مشر سید احمد قریشي وویل تېر کال د خبریالانو لپاره یو خونړۍ کال یاد کړی چې یوویشت خبریالان پکې قرباني شوي دي.
د برتانیا سفارت استازی او د ملګرو ملتونو ځانګړي استازی هم د دې غونډې ویناوال و چې د خبریالانو او دولتي ادارو ترمنځ همغږي او همکارۍ باندې یې ټینګار درلود.
د افغانستان لپاره د ملګرو ملتونو ځانګړي استازی تدامیچي یماماتو داسې وویل (( موږ چې وروستیو لاس ته راړنو ته ګورو نو پوهیږو چې رسنیو څومره کار کړی دی. رسنیو خپله دا فرض په ډیرو بد حالاتو کې ترسره کړی دی.))
د برتانیا سفارت استازی جایلز لیور داسې وویل (( د رسنیو او حکومت اړیکې د ګډ پرمختګ لپاره ډیر اړین دي. رسنیو په افغانستان کې د ولسواکۍ په بهیر کې ډیر غوره رول لوبولای دی. ))
د کب نهمه چې د خبریالانو لپاره ملي ورځ نومول شوې دا یې لومړی کال دی چې نمانځل کیږي.
