مشرانوجرګه سوله غواړي خو دا سوله نباید د نظام د بدلون په بیه وي.
د مشرانو جرګې رییس د موقت حکومت طرحه د افغان دښمن کړیو او هېوادونو وبلله چې هیڅ افغان ته به د منلو نه وي.
فضل هادي مسلمیار پاکستان تورن کړ چې جنرالانو یې د پانګونې لپاره افغانستان کې د جګړې دوام ته بډې وهلي.
مسلمیار د یو خبري کنفرانس پرمهال د پاکستان د لومړي وزیر هغه څرګندونې د افغانستان په چارو کې مداخله وبلله چې د یو نوي حکومت په تړاو یې کړي.
د مشرانو جرګې رییس فضل هادي مسلمیار سره دواړه مرستیالان هم غونډه ته راغلي و او د هېواد په وروستي وضعیت باندې یې خبرې وکړې.
فضل هادي مسلمیار وویل دا چې د سولې په بدل کې د مؤقت حکومت د رامنځ ته کیدو خبرې کیږي دغه طرحه افغانانو ته د منلو نه ده او نه غواړي چې اتلس کاله شاته وګرځي .
مسلمیار وايي د پاکستان ستر سوداګر د دغه هیواد پوځي جنرالان دي چې دغه پیسې یې د افغانستان له جګړې ترلاسه کړي او اوس نه غواړي جګړه په سوله بدله شي .
د پاکستان د لومړي وزیر عمران خان هغو څرګندونو ته هم مسلمیار توند غبرګون وښود چې افغانستان کې د نوي او لنډه مهال حکومت د رامنځ ته کیدو وړاندوینه یې کړې .
د امریکا له متحده ایالاتو هم غوښتنه وشوه چې له طالبانو سره د کړو مذاکراتو پایلې باید افغان حکومت او افغانانو سره شریکې کړي .
