ولسمشر غني د مشورتي لویې جرګې د جوړېدو بل فرمان ورکړ.
ولسمشر غني په تازه فرمان کې د سولې عالي شورا دارالانشاء ته دنده سپارلې چې د راتلونکي لمریز کال په ثور میاشت کې مشورتي لویه جرګه جوړه کړي.
د ولسمشر په فرمان کې راغلي چې لویه جرګه د خلکو د مشورو، نظرونو او شننو د ښه اورېدو، د حل لارې پیدا کېدو او د مذاکراتو د چټکوالو په موخه رابلل کېږي.
ټاکل شوې وه د سولې مشورتي لویه جرګه د روانې لمریزې میاشتې په شپږویشتمه نېټه ترسره شوې وای، خو د سولې شورا د رییس په وینا غونډې ته د ټولو ګډونوالو د رابللو په موخه یې نېټه وځنډېده.
تازه ولسمشر غني په یو فرمان کې د سولې عالي شورا د دارالانشاء د مشورتي لویې جرګې کمېسیون د مشر په توګه ټاکلی او دنده یې ورسپارلې چې جرګې لپاره چمتووالی ونیسي.
د ولسمشر غني فرمان (( کمېسیون دې د ۱۳۹۸ لمریز کال د ثور میاشتې په نهمه نېټه مشورتي لویه جرګه جوړه کړي او د ماليې وزارت مکلف دی چې د کمېسیون د رییس په وړاندیز د مشورتي لویې لګښتونه له ۹۱یم کوډ څخه برابر کړي.))
ولسمشر غني د مشورتي لویې جرګې د ښه ترسره کېدو په موخه یو شمېر دولتي ادارې په دنده ګومارلي چې له کمېسیون سره په اړوندو چارو کې همکاري وکړي.
د ولسمشر غني فرمان (( د پوهنې، لوړو زده کړو، قومونو قبایلو او سرحدونو، د ارشاد حج او اوقافو، ښځو چارو، د کډوالو او بېرته راستنېدونکو چارو وزارتونه؛ د سیمه ییزو ارګانونو اداره، کابل ښاروالي او یو شمېر نورې ادارې موظفې دي چې له کمېسیون سره په اړوندو چارو کې همکاري وکړي.))
فرمان کې راغلي چې مشورتي لویه جرګه کې به د ټولو ولایتونو استازي له طالبانو سره د مذاکراتو د چوکاټ او سولې ته د رسېدو د څرنګوالي پر تعریف بحث وکړي.
په فرمان کې لیکلي شوي چې د مشورتي لویې جرګې وروسته به حکومت د سولې او مذاکراتو مسیر تدوین او بشپړ کړي.
