د سولې او اعتدال ټاکنیز ټیم په ارګ تورونه ولګول.
د سولې او اعتدال ټاکنیز ټیم ارګ تورن کړ چې یو شمېر ښځو ته پیسې ورکوي څو په راتلونکو ټاکنو کې ترې ملاتړ وکړي.
حنیف اتمر وایي، حکومت ملت ته فریب ورکوي او د کمپاین په موخه یوه پروژه دویم ځل بیا پرانیزي.
د ښځو نړیوالې ورځې په مناسبت جوړې شوې غونډه کې ښځو وویل، له نارینه و سره برابري او په راتلونکي سیاسي نظام کې پنځوس سلنه ونډه غواړي.
په دې غونډه کې د سولې او اعتدال ټاکنیز ټیم د ښځو نړیواله ورځ ونمانځّله چې د ویناوالو زیات تمرکز یې د حکومت په نیمګړتیاوو و.
ټینګار دا و چې حکومت دې دشت برچي کې د تیرې پنجشنبې ورځې د برید په اړه جدي او بې طرفه څېړنې وکړي او ملت ته دې روښانه کړي چې د برید تر شاه د چا لاس و.
د سولې او اعتدال ټیم مشر حنیف اتمر پر حکومت نیوکې وکړې چې خلکو ته فریب ورکوي او ولایتونو ته په سفرونو کې پخوانۍ پرانیستل شوې پروژې بیا پرانیزي.
په یاده غونډه کې په ارګ تور پورې شو چې یو شمېر ښځو ته د کمپاین لپاره پيسې ورکوي.
غونډه کې ښخو وویل، له نارینه و سره برابري او په راتلونکي سیاسي نظام کې ۵۰ سلنه ونډه غواړي.
دوی وایي، افغان ښځو اوس ډیر پرمختګ کړی او نه غواړي چې بیرته شاتګ وکړي.
غونډه کې فقر، جنګ او نا امني، د قانون نه حاکمیت، صحرایي محکمې، اجباري ودونه، په سیاسي مشارکت کې د ښځو محدوده ونډه او غیر مسؤلانه حکومتولي هغه لاملونه یاد شول چې افغانستان کې یې د ښځو د ژوند د بهبود مخه نیولې ده.
