قطر کې د طالبانو او امریکا ترمنځ د سولې له خبرو افغان دولت بې خبره دی.
د حزب اسلامي مشر ګلبدین حکمتیار وایي، د طالبانو او امریکا خبرې په مخ تللي او باید ورته هیله من اوسو، خو په وینا یې افغان حکومت ترې نا خبره ده.
حکمتیار ویلي، حکومت د قطر دفتر د مذاکراتو له پایلې ویره لري او وروستۍ څرګندونې یې دا روښانه کوي چې دوی ته کافي مالومات نه ورکول کېږي.
د حکمتیار په خبره، که امریکا له طالبانو دا ضمانت واخلي چې افغان خاوره به د چا په ضد نه کارول کېږي، نو په دې مانا چې امریکا واک طالبانو ته سپاري.
هغه ویلي، سوله هغه وخت ممکنه ده چې طالبان اوربند اعلان کړي، بین الافغاني مذاکراتو ته غاړه کېږدي او ټاکنې ومني.
خو ارګ بیا وایي، قطر کې د سولې خبرو له ټول بهیره خبرېږي او مشورې هم ورسره کېږي.
ولسمشرۍ ماڼۍ وایي، خلیلزاد له ولسمشر سره اړیکې لري او د قطر له مذاکراتو یې وخت په وخت خبروي.
ارګ ویلي، د هر هغه اقدام ملاتړ کوي چې له افغان حکومت سره په همغږۍ مخ ته لاړ شي او پایله یې هم له افغان حکومت سره شریکه شي.
بل پلو وړمه ورځ طالبانو ویلي، د افغانستان موضوع بهرنی او داخلي اړخ لري چې دوی اوسمهال یوازې په بهرني اړخ خبرې روانې کړي.
طالب ویاند ذبیح الله مجاهد ویلي، بهرنی اړخ د امریکا پورې اړوند دی او په دې پړاو کې له افغانستان د بهرنیو ځواکونو په وتلو او افغان خاوره د چا په ضد نه کارولو بحث کېږي.
د مجاهد په خبره داخلي اړخ بیا د امریکا پورې تړاو نه لري او په هغې به وروسته خبرې کوي.
